પ્રયાગરાજ:  ઉત્તર પ્રદેશના આઝમગઢ સ્થિત મદરેસા જમિયતુલ કુરેશી જલાલંધ્રીના શિક્ષકો અને કર્મચારીઓ માટે અલ્હાબાદ હાઇકોર્ટ તરફથી ભારે નિરાશાજનક સમાચાર આવ્યા છે. છેલ્લા લગભગ ચાર દાયકા એટલે કે ૧૯૮૭થી અટકેલા પગાર અને સેવાઓને પુનઃસ્થાપિત કરવાની માંગ સાથે દાખલ કરવામાં આવેલી અરજીને હાઇકોર્ટે સખત શબ્દોમાં ફગાવી દીધી છે. જસ્ટિસ મંજુ રાની ચૌહાણની સિંગલ બેન્ચે આ મહત્વપૂર્ણ આદેશ આપતા સ્પષ્ટ કર્યું હતું કે ભૂતકાળમાં કોઈ ચોક્કસ સમયગાળા માટે પગાર મળી ગયો હોય કે માસિક સ્ટેટમેન્ટમાં નામ સામેલ હોય, તેનાથી કાયદેસરની નિમણૂક સાબિત થતી નથી.

આ વિવાદની શરૂઆત ત્યારે થઈ હતી જ્યારે પરવેઝ આલમ, આફતાબ હુસૈન, અરશદ હુસૈન સહિતના અન્ય કર્મચારીઓએ દાવો કર્યો હતો કે તેમની નિમણૂક ૧૯૮૧ થી ૧૯૮૭ વચ્ચે થઈ હતી અને મે ૧૯૮૭ સુધી તેમને નિયમિત વેતન પણ મળતું હતું. તેમની દલીલ હતી કે મેનેજમેન્ટ કમિટીના આંતરિક વિવાદોને કારણે તેમનો પગાર બંધ કરી દેવાયો હતો, પરંતુ તેમની સેવાઓ ક્યારેય સત્તાવાર રીતે સમાપ્ત કરવામાં આવી નહોતી. વર્ષ ૨૦૦૩માં લઘુમતી કલ્યાણ વિભાગ દ્વારા પગારના દાવાઓને નકારી કાઢવામાં આવ્યા બાદ અરજદારોએ હાઇકોર્ટના દ્વાર ખટખટાવ્યા હતા.

જોકે, સુનાવણી દરમિયાન રાજ્ય સરકાર અને તપાસ અહેવાલોએ ચોંકાવનારા ખુલાસા કર્યા હતા. વર્ષ ૨૦૧૮ના પ્રિન્સિપાલના રિપોર્ટમાં સામે આવ્યું કે આ કર્મચારીઓએ ક્યારેય સંસ્થામાં વાસ્તવિક સેવા આપી જ નહોતી અને તેમના જોઇનિંગ લેટર્સ પર પ્રિન્સિપાલની બનાવટી (બોગસ) સહીઓ કરવામાં આવી હતી. આ સિવાય ભરતી પ્રક્રિયા માટે કોઈ સરકારી જાહેરાત કે નિયમોનું પાલન થયું નહોતું. કોર્ટે "કામ નહીં તો પગાર નહીં" (No Work, No Pay) ના કાનૂની સિદ્ધાંત અને ગેરકાયદેસર ભરતીના આધાર પર ૨૦ વર્ષ જૂની આ અરજીને આખરે ખાતમો આપ્યો હતો.