કન્નૌજ: ઉત્તર પ્રદેશના કન્નૌજમાં લખનૌ-આગ્રા એક્સપ્રેસ વે પર મોડી રાત્રે સર્જાયેલા એક માર્ગ અકસ્માતે મોટી દાણચોરીનો પર્દાફાશ કર્યો છે. કંવર યાત્રાની બંદોબસ્ત ડ્યુટી પૂર્ણ કરીને પરત ફરી રહેલા તાલગ્રામ પોલીસ સ્ટેશનના પોલીસકર્મીઓના વાહન સાથે અચાનક એક કાર ધડાકાભેર અથડાઈ હતી. અકસ્માત બાદ પોલીસે સાવચેતીના ભાગરૂપે કારની પ્રાથમિક તપાસ હાથ ધરી ત્યારે અંદરથી એક શંકાસ્પદ બેગ મળી આવી હતી. પોલીસે જ્યારે આ બેગ ખોલી ત્યારે તેમની આંખો પહોળી થઈ ગઈ હતી, કારણ કે અંદરથી આશરે 10 કિલો વજન ધરાવતા 10 મોટા સોનાના બિસ્કિટ મળી આવ્યા હતા, જેની બજાર કિંમત કરોડો રૂપિયામાં આંકવામાં આવી રહી છે.

આટલા મોટા જથ્થામાં બિનહિસાબી સોનું મળતા પોલીસે તાત્કાલિક કારમાં સવાર બે યુવાનોની અટકાયત કરી લીધી છે. આ યુવાનો પાસે સોનાની ખરીદી કે પરિવહનને લગતા કોઈ જ કાયદેસરના દસ્તાવેજો કે બિલ ન હોવાથી પોલીસે આ મામલે કસ્ટમ્સ વિભાગને પણ સત્તાવાર જાણ કરી છે. હાલમાં સોનાના વાસ્તવિક વજન અને તેની શુદ્ધતાની પુષ્ટિ કરવા માટે સ્થાનિક સુવર્ણકારોને ઘટનાસ્થળે બોલાવીને તપાસ કરાવવામાં આવી રહી છે. પકડાયેલા બંને શખ્સો આ ખજાનો ક્યાંથી લાવ્યા હતા અને રાતના અંધારામાં કોને ડિલિવરી આપવા જઈ રહ્યા હતા તે અંગે સઘન પૂછપરછ ચાલી રહી છે.

એક સામાન્ય માર્ગ અકસ્માતમાં થયેલી આ કરોડોની રિકવરીએ આંતરરાજ્ય દાણચોરીના મોટા નેટવર્ક તરફ ઈશારો કર્યો છે. હાલ કસ્ટમ્સ અને સ્થાનિક પોલીસની સંયુક્ત ટીમ સમગ્ર મામલાની ઊંડાણપૂર્વક તપાસ કરી રહી છે કે શું આ સોનાનું પરિવહન કાયદેસર રીતે થઈ રહ્યું હતું કે પછી તેમાં મોટા સ્મગલરો સંડોવાયેલા છે.