​બરલિન: જર્મન કપ સ્પર્ધા દરમિયાન રમતગમત જગતને શરમજનક સ્થિતિમાં મૂકે તેવી એક મોટી ઘટના સામે આવી છે. એસવી વાલ્ધોફ માન્હેમ અને એફસી કાઈઝર્સલોટર્ન વચ્ચે રમાયેલી હાઈ-વોલ્ટેજ મેચ દરમિયાન સ્ટેડિયમમાં હાજર ચાહકોના ભારે ઉપદ્રવના કારણે રમતને અધવચ્ચે જ રોકી દેવાની ફરજ પડી હતી. બે ચિરપ્રતિદ્વંદ્વી ટીમો વચ્ચેની આ સ્પર્ધામાં દર્શકોએ શિસ્તના તમામ નિયમો તોડીને મેદાનમાં પિચ પર ધસી જઈ હંગામો મચાવ્યો હતો અને વિરોધ સ્વરૂપે તીવ્ર આતશબાજી કરી હતી.

​પ્રાપ્ત વિગતો અનુસાર, મેચ દરમિયાન સ્ટેડિયમનું વાતાવરણ શરૂઆતથી જ તંગ હતું. રમત દરમિયાન અચાનક એક સ્ટેન્ડમાંથી પ્રેક્ષકોએ સુરક્ષા ઘેરાવ તોડીને પિચ પર પ્રવેશ કરી લીધો હતો. આ સાથે જ સ્ટેડિયમની અંદર મોટા પ્રમાણમાં ફટાકડા અને રોકેટ ફોડવામાં આવ્યા હતા, જેના કારણે સમગ્ર મેદાન ધુમાડાથી ભરાઈ ગયું હતું. આ અરાજકતા અને ખેલાડીઓની સુરક્ષાને ધ્યાનમાં રાખીને નિર્ણાટકો દ્વારા રમત તાત્કાલિક ધોરણે સ્થગિત કરી દેવામાં આવી હતી. સુરક્ષા કર્મચારીઓ અને સ્થાનિક પોલીસ સત્તાવાળાઓએ ભારે જહમત બાદ પરિસ્થિતિ પર કાબૂ મેળવ્યો હતો.

​અસાધારણ વિલંબ અને પરિસ્થિતિ સામાન્ય થયા બાદ રમત પુનઃ શરૂ કરવામાં આવી હતી. નિર્ધારિત સમય સુધી બંનેમાંથી એક પણ ટીમ ગોલ કરવામાં નિષ્ફળ રહેતા મુકાબલો એક્સ્ટ્રા ટાઈમમાં પહોંચ્યો હતો. એક્સ્ટ્રા ટાઈમ દરમિયાન કાઈઝર્સલોટર્ન ટીમે શાનદાર તકનીકી રમત દાખવીને ૧-૦થી નિર્ણાયક લીડ મેળવી લીધી હતી. વાલ્ધોફ માન્હેમની ટીમે વાપસી કરવા માટે ઘણા પ્રયાસો કર્યા હતા પરંતુ કાઈઝર્સલોટર્નની મજબૂત ડિફેન્સે તેમના તમામ આક્રમણોને નિષ્ફળ બનાવ્યા હતા. અંતે, કાઈઝર્સલોટર્ને ૧-૦થી આ નાટ્યાત્મક મેચ જીતીને જર્મન કપના આગામી રાઉન્ડમાં પોતાની જગ્યા પાકી કરી લીધી હતી.