લખનૌ : ઉત્તર પ્રદેશમાં ૧૫ ઓક્ટોબરથી શરૂ થઈ રહેલી નવી શેરડી પિલાણ સીઝન (Crushing Season) પૂર્વે યોગી આદિત્યનાથ સરકારે મોટો અને મહત્વપૂર્ણ નિર્ણય લીધો છે. રાજ્યમાં ખાંડની પૂરતી ઉપલબ્ધતા અને ભાવો નિયંત્રણમાં રહે તે માટે મુખ્યમંત્રી યોગી આદિત્યનાથે શનિવારે એક ઉચ્ચસ્તરીય બેઠકમાં ખાંડની સંગ્રહખોરી અને કાળાબજારી સામે અત્યંત કડક કાર્યવાહી કરવાના આદેશ જારી કર્યા છે.

સરકારી આંકડાઓ અનુસાર, હાલમાં ઉત્તર પ્રદેશની ખાંડ મિલો પાસે બજાર પૂરવઠા માટે ૧૭૯.૩૮ લાખ ક્વિન્ટલ ખાંડનો વિશાળ સ્ટોક ઉપલબ્ધ છે. આમાંથી સહકારી મિલો પાસે ૨૩.૬૦ લાખ ક્વિન્ટલ, કોર્પોરેશન સંચાલિત મિલો પાસે ૫.૨૮ લાખ ક્વિન્ટલ અને ખાનગી મિલો પાસે ૧૫૦.૫૦ લાખ ક્વિન્ટલ સ્ટોક હાજર છે. પૂરતો જથ્થો હોવા છતાં કોઈ વેપારી કે ડીલર કૃત્રિમ અછત ઊભી કરીને ભાવોમાં સટ્ટાખોરી ન કરે તે માટે તંત્રને સતત નિરીક્ષણ કરવા જણાવાયું છે.

૩૦ દિવસથી વધુ સંગ્રહ પર મનાઈ, ઈસ્મા હેઠળ ગુનો નોંધાશે

મુખ્યમંત્રીએ સ્પષ્ટ નિર્દેશ આપ્યા છે કે કોઈપણ ખાંડ ડીલર નિર્ધારિત સમયગાળા એટલે કે ૩૦ દિવસથી વધુ સમય માટે ખાંડનો સંગ્રહ કરી શકશે નહીં. આ ઉપરાંત, ૪૦૦ ટનથી વધુનો સ્ટોક રાખનારા ડીલરો સામે પણ આકરાં પગલાં લેવાશે. નિયમોનું ઉલ્લંઘન કરનારા અને ગેરકાયદે સંગ્રહખોરી કરનારા તત્વો સામે 'આવશ્યક સેવા જાળવણી અધિનિયમ' (ESMA) હેઠળ ગુનો નોંધી જેલભેગા કરવાની ચેતવણી આપવામાં આવી છે.

ખાંડ સમીક્ષા અને સુગર મિલોના મહત્વના આંકડા:

• કુલ ઉપલબ્ધ સ્ટોક: ૧૭૯.૩૮ લાખ ક્વિન્ટલ (ખાનગી મિલો: ૧૫૦.૫૦ લાખ ક્વિન્ટલ)

• સ્ટોક નિયંત્રણ સીમા: મહત્તમ ૪૦૦ ટન સ્ટોક અને ૩૦ દિવસની કાળમર્યાદા

• ખેડૂતોને ચૂકવણી: ૪૮ લાખ શેરડી ખેડૂતોને રૂ. ૩,૨૧૭ કરોડની બાકી ચુકવણી પૂર્ણ

• નવી પિલાણ સીઝન: ૧૫ ઓક્ટોબર, ૨૦૨૬થી ઉત્તર પ્રદેશમાં પ્રારંભ