લાતુર : મહારાષ્ટ્રના લાતુર જિલ્લામાં સરકારી શાળાઓની કથિત ખરાબ સ્થિતિ સામે ઝુંબેશ ચલાવી રહેલા 'કોકરોચ જનતા પાર્ટી' (CJP) ના કન્વીનર અભિજીત દિપકે અને તેમના સાથીદારો સામે પોલીસે ગંભીર કલમો હેઠળ એફઆઈઆર (FIR) નોંધી છે. તેમના પર પરવાનગી વગર સરકારી શાળા પરિસરમાં પ્રવેશીને શૈક્ષણિક કામગીરીમાં ખલેલ પહોંચાડવાનો તેમજ શિક્ષકોને ધાકધમકી આપવાનો આક્ષેપ મૂકવામાં આવ્યો છે.

મળતી વિગતો અનુસાર, આ ઘટના ઔસા નજીક આવેલા જાવલી ગામની જિલ્લા પરિષદ ઉર્દૂ શાળામાં બની હતી. શાળાના મહિલા શિક્ષક સૈયદ શમશાદબાનોની લેખિત ફરિયાદના આધારે ઔસા પોલીસ સ્ટેશન ખાતે આ કાર્યવાહી કરવામાં આવી છે. CJP ના કન્વીનર અભિજીત દિપકે હાલમાં લાતુર જિલ્લાની વિવિધ સરકારી શાળાઓમાં "શાળાઓ ઠીક કરો" (Fix Schools) નામનું અભિયાન ચલાવી રહ્યા છે, જે અંતર્ગત તેઓ શાળાની મુલાકાત લેવા પહોંચ્યા હતા.

વિદ્યાર્થીઓ વચ્ચે બેસીને વીડિયો બનાવ્યો અને બદનક્ષી કરી

પોલીસ ફરિયાદમાં જણાવ્યા મુજબ, દિપકે અને તેમના સમર્થકોએ કોઈપણ જાતની વહીવટી પરવાનગી વગર શાળામાં પ્રવેશીને વિદ્યાર્થીઓ વચ્ચે બેસી વિવિધ પ્રશ્નો પૂછવાનું શરૂ કર્યું હતું. આ સમગ્ર ઘટનાનું શૂટિંગ કરીને વીડિયો સોશિયલ મીડિયા પર શેર કરવામાં આવ્યો હતો. શિક્ષકોનો આરોપ છે કે દિપકે બીજી શાળાના વિદ્યાર્થીઓને લાવીને ખોટો વિવાદ ઊભો કરવાનો પ્રયાસ કર્યો હતો અને શિક્ષકોને અંદરોઅંદર સસ્પેન્ડ કરાવી દેવાની ધમકી આપીને શાળાને બદનામ કરી હતી.

પોલીસ કાર્યવાહી અને લાગુ કરાયેલી કલમો:

• ઘટનાસ્થળ: જિલ્લા પરિષદ ઉર્દૂ શાળા, જાવલી (ઔસા, જિલ્લો લાતુર)

• ફરિયાદી: શિક્ષક સૈયદ શમશાદબાનો

• IPC કલમો: કલમ ૧૩૨ (સરકારી ફરજમાં રૂકાવટ), ૩૨૯(૩) (ઘૂસણખોરી), ૩૫૧(૨) (ધાકધમકી) અને ૩૫૬(૨) (બદનક્ષી)

• પોલીસ તપાસ: ઔસા પોલીસ સ્ટેશન દ્વારા ઘટનાના વાયરલ વીડિયો અને અન્ય પુરાવાઓની ઝીણવટભરી તપાસ શરૂ.