મુંબઈ: મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) દ્વારા મુંબઈના પોશ વિસ્તાર ગણાતા કોલાબા સ્થિત મેકડોનાલ્ડ્સ (McDonald's) આઉટલેટનું ફૂડ બિઝનેસ લાઈસન્સ તાત્કાલિક અસરથી સસ્પેન્ડ કરી દેવામાં આવ્યા બાદ ભારે ખળભળાટ મચી ગયો છે. FDA ની આ આકરી કાર્યવાહીના બીજા જ દિવસે, મેકડોનાલ્ડ્સ ઈન્ડિયાએ શનિવારે એક સત્તાવાર નિવેદન જારી કરીને પોતાનો પક્ષ રજૂ કર્યો છે. કંપનીએ સ્પષ્ટતા કરી છે કે તેઓ ખોરાકની ગુણવત્તા અને સ્વચ્છતાના ઉચ્ચ ધોરણો જાળવવા માટે કટિબદ્ધ છે અને ખાદ્ય સુરક્ષાના મુદ્દાઓ પર 'ઝીરો-ટોલરન્સ' (શૂન્ય-સહનશીલતા) ની નીતિ ધરાવે છે.

FDA ના આકસ્મિક નિરીક્ષણ દરમિયાન કોલાબા આઉટલેટના રસોડામાં અને ખોરાક બનાવવાની જગ્યાઓ નજીક ગંભીર ક્ષતિઓ મળી આવી હતી. તપાસ અહેવાલ અનુસાર, પરિસરમાં વંદો અને અન્ય જીવાતોનો ઉપદ્રવ, નબળું તાપમાન નિયંત્રણ, ફ્લોર પર સડતો ખોરાકનો કચરો તથા સ્ટાફની અપૂરતી સ્વચ્છતા જેવી મોટી બેદરકારીઓ સામે આવી હતી. જોકે, આઉટલેટ દ્વારા અગાઉ ૧૨ ઓગસ્ટે ૧૪૮ પાનાનો પાલન અહેવાલ આપી તમામ ખામીઓ સુધારી લીધી હોવાનો દાવો કરાયો હતો, પરંતુ પુનઃ તપાસમાં સ્થિતિ જસની તસ માલૂમ પડતા FDA એ કડક વલણ અપનાવ્યું હતું. લાઈસન્સિંગ ઓથોરિટીને ખોટી માહિતી આપવા બદલ ફૂડ સેફ્ટી એન્ડ સ્ટાન્ડર્ડ્સ એક્ટ, ૨૦૦૬ ની કલમ ૬૧ હેઠળ ગુનો પણ નોંધવામાં આવ્યો છે.

બીજી તરફ, મેકડોનાલ્ડ્સ ઈન્ડિયાએ પોતાના નિવેદનમાં જણાવ્યું છે કે, "અમે સરકારી નિયમનકારી પ્રક્રિયાનો સંપૂર્ણ આદર કરીએ છીએ અને રિપોર્ટમાં જણાવેલી વિગતોની સમીક્ષા કરી રહ્યા છીએ. અમે અમારા તમામ ઉત્પાદનોમાં અસલી ચીઝ અને પનીર સહિત સખત ખાદ્ય ગુણવત્તા અને સ્વચ્છતાના ધોરણોનું પાલન કરીએ છીએ." ગ્રાહકોનો વિશ્વાસ પુનઃસ્થાપિત કરવા કંપનીએ ગ્રાહકોને તેમની રસોડાની પદ્ધતિઓ અને સ્વચ્છતા જોવા માટે કિચન ટૂર (રસોડાની મુલાકાત) લેવાનું પણ આમંત્રણ આપ્યું છે.

ઉલ્લેખનીય છે કે, મહારાષ્ટ્ર FDA દ્વારા હાલ સમગ્ર રાજ્યમાં ખાદ્ય પદાર્થોની ગુણવત્તા તપાસવા માટે વ્યાપક ઝુંબેશ ચલાવવામાં આવી રહી છે. આ ઝુંબેશ હેઠળ બાંદ્રા-કુર્લા કોમ્પ્લેક્સ (BKC) ખાતે આવેલા મુંબઈ ક્રિકેટ એસોસિએશન (MCA) સુવિધાનું ફૂડ લાઈસન્સ પણ સ્વચ્છતાના અભાવે સસ્પેન્ડ કરવામાં આવ્યું છે, જેના પગલે MCA એ પણ તેની તમામ રેસ્ટોરન્ટ અને ખાદ્ય સેવાઓ આગામી આદેશ સુધી બંધ કરી દીધી છે.