પારાદીપ:  બંગાળની ખાડીના તોફાની પાણીમાંથી એક અત્યંત ચોંકાવનારા અને ચિંતાજનક સમાચાર સામે આવ્યા છે, જ્યાં ઓડિશાના દરિયાકાંઠેથી ૨૪૦ નોટિકલ માઈલ દૂર પનામાના ધ્વજવાળું એક વિશાળ કાર્ગો જહાજ રહસ્યમય સંજોગોમાં ડૂબી જતાં આંતરરાષ્ટ્રીય દરિયાઈ ક્ષેત્રમાં મોટો હડકંપ મચી ગયો છે.
પ્રાપ્‍ત માહિતી અનુસાર આ ભયાનક દુર્ઘટનાની શરૂઆત ૨૦ ઓગસ્ટની રાત્રે અંદાજે ૧૦:૩૦ વાગ્યે થઈ હતી, જ્યારે આ પનામા ધ્વજવાળું જહાજ ઓડિશાના પારાદીપ બંદર પરથી ૧,૭૦૦ ટન આયર્ન ઓર ફાઈન્સનો જથ્થો ભરીને સમુદ્રમાં રવાના થયું હતું. જહાજ જ્યારે દરિયામાં આગળ વધી રહ્યું હતું ત્યારે અચાનક તેનું લોકેશન અને કંટ્રોલ રૂમ સાથેનો સંપર્ક તૂટી ગયો હતો. આ જહાજ પર કુલ ૨૪ જેટલા ક્રૂ સભ્યો સવાર હોવાની માહિતી મળી છે, જેમાં મોટાભાગના નાગરિકો ચીનના હોવાનું તેમજ કેટલાક સભ્યો મ્યાનમાર અને બાંગ્લાદેશના હોવાની પ્રાથમિક વિગતો સામે આવી છે.
સંપર્ક વિહોણા બનેલા આ જહાજ અને તેમાં સવાર ખલાસીઓની શોધખોળ માટે તંત્ર દ્વારા તાત્કાલિક કડક પગલાં લેવામાં આવ્યા છે. ભારતીય કોસ્ટ ગાર્ડના પારાદીપ યુનિટના ડેપ્યુટી ઇન્સ્પેક્ટર જનરલ સંજય નેગીએ જણાવ્યું છે કે આંદામાન અને નિકોબાર યુનિટના સહયોગથી સર્ચ અને રેસ્ક્યુ ઓપરેશનને વેગ આપવામાં આવ્યો છે. આસપાસના અન્ય વેપારી જહાજોને પણ રેસ્ક્યુ કામગીરીમાં મદદ કરવા માટે ખાસ એલર્ટ જારી કરવામાં આવ્યા છે. જોકે, હજુ સુધી એ સ્પષ્ટ થઈ શક્યું નથી કે આ દુર્ઘટના પાછળ અચાનક સર્જાયેલું ખરાબ હવામાન જવાબદાર છે કે પછી જહાજમાં કોઈ ગંભીર ટેકનિકલ ખામી સર્જાઈ હતી.
આ ગંભીર દરિયાઈ અકસ્માતના કારણે દરિયાઈ સુરક્ષા એજન્સીઓમાં દોડધામ મચી ગઈ છે અને ક્રૂ સભ્યોના જીવન પર મોટો ખતરો તોળાઈ રહ્યો છે. જહાજ ડૂબવા પાછળના ચોક્કસ કારણો અને તેમાં સવાર તમામ સભ્યોની હાલત વિશે સત્તાવાર પુષ્ટિ થવાની હજુ રાહ જોવામાં આવી રહી છે. ભારતીય નૌકાદળ અને કોસ્ટ ગાર્ડની ટીમો જીવના જોખમે ગુમ થયેલા નાગરિકોને શોધવા માટે દરિયામાં આકાશ-પાતાળ એક કરી રહી છે.
બંગાળની ખાડીમાં બનેલી આ આકસ્મિક દુર્ઘટનાએ દરિયાઈ માર્ગે થતા વેપાર અને જહાજોની સલામતી સામે ફરી એકવાર ગંભીર પ્રશ્નાર્થ ચિન્હો ખડા કરી દીધા છે, ત્યારે તમામની નજર બચાવ ટીમોના આગામી અહેવાલો પર ટકેલી છે.