બેંગલુરુ : દક્ષિણ ભારતના સુપરસ્ટાર યશની આગામી ચર્ચાસ્પદ ફિલ્મ 'ટોક્સિક' માટે હૈદરાબાદની મલ્લા રેડ્ડી યુનિવર્સિટીમાં એક ભવ્ય પ્રી-રિલીઝ કાર્યક્રમ યોજાયો હતો, જ્યાં હજારો યુવાનોની ભારે ભીડ વચ્ચે અચાનક સાઉન્ડ સેટઅપ તૂટી પડવાથી એક ગંભીર અકસ્માત સર્જાયો હતો અને બે લોકો ઘાયલ થયા હતા.
મળતી વિગતો અનુસાર, યુનિવર્સિટી પરિસરમાં યોજાયેલા આ ભવ્ય કાર્યક્રમમાં મોટી સંખ્યામાં લોકો એકઠા થયા હતા. પોલીસ દ્વારા વારંવાર વિનંતી કરવા છતાં અનેક ઉત્સાહી ચાહકો સ્ટેજની અત્યંત નજીક પહોંચી ગયા હતા, જેના કારણે ભારે ધસારો થતાં સાઉન્ડ સિસ્ટમનું માળખું ધસી પડ્યું હતું.
આ અકસ્માત થતાં જ ઇવેન્ટમાં થોડીવાર માટે અફરાતફરી મચી ગઈ હતી. પરિસ્થિતિની ગંભીરતા પારખીને અભિનેતા યશે તુરંત જ પોતાનું ભાષણ અટકાવી દીધું હતું અને સ્ટેજ પરથી જ અધિકારીઓ તેમજ આયોજકોને તાત્કાલિક ઘાયલોની મદદે દોડી જવા અપીલ કરી હતી. તંત્ર દ્વારા તાકીદે કાર્યવાહી કરીને બંને ઈજાગ્રસ્તોને સારવાર માટે નજીકની હોસ્પિટલમાં ખસેડવામાં આવ્યા હતા.
સેલિબ્રિટીના મોટા પબ્લિક ઇવેન્ટ્સ અને કોન્સર્ટ દરમિયાન ભીડ નિયંત્રણ (Crowd Management) અને સેફ્ટી પ્રોટોકોલના પાલનનો મુદ્દો અગાઉ પણ ચર્ચામાં રહ્યો છે. આ દુર્ઘટના બાદ સ્થાનિક પોલીસ પ્રશાસન દ્વારા ભીડ વ્યવસ્થાપનને લઈને કડક નિયમો બનાવવા અને સમગ્ર મામલે આયોજકોની બેદરકારીની તપાસ કરવાના સંકેતો આપવામાં આવ્યા છે.