નવી દિલ્હી:કેન્દ્રીય સશસ્ત્ર પોલીસ દળો (CAPF) ના નિવૃત્ત અને વર્તમાન કર્મચારીઓ દ્વારા આગામી ૭ નવેમ્બરથી દિલ્હીના જંતર-મંતર પર ઉગ્ર ભૂખ હડતાળ પર ઉતરવાની જાહેરાત કરવામાં આવી છે. 'ઓલ એક્સ-પેરામિલિટરી ફોર્સીસ વેલ્ફેર એસોસિએશન'ના બેનર હેઠળ આયોજિત આ વિરોધ પ્રદર્શનનું મુખ્ય કારણ તાજેતરમાં અમલમાં આવેલો વિવાદાસ્પદ 'કેન્દ્રીય સશસ્ત્ર પોલીસ દળો (જનરલ એડમિનિસ્ટ્રેશન) અધિનિયમ, 2026' છે, જે CRPF અને CISF જેવા મહત્વપૂર્ણ દળોને લાગુ પડે છે. આ કાયદાના વિરોધ સાથે કર્મચારીઓ લાંબા સમયથી અટવાયેલી જૂની પેન્શન યોજના (OPS) ને પુનઃસ્થાપિત કરવાની અને ઉચ્ચ હોદ્દાઓ પર ડેપ્યુટેશનના વધતા વર્ચસ્વને અટકાવવાની માંગ કરી રહ્યા છે.

ઘટનાની વિગતો આપતા એસોસિએશનના સેક્રેટરી રણબીર સિંહે કેન્દ્ર સરકાર પર તેમની વર્ષો જૂની માંગણીઓની સતત ઉપેક્ષા કરવાનો ગંભીર આરોપ લગાવ્યો છે. તેમણે નવા કાયદાને "કારો કાયદો" ગણાવતા જણાવ્યું હતું કે અગાઉ ગૃહમંત્રી અમિત શાહને પત્ર લખીને આ કાયદો રદ કરવાની માંગ કરવામાં આવી હતી, પરંતુ સરકાર તરફથી કોઈ સકારાત્મક પ્રતિભાવ ન મળતાં તેમની પાસે આ આંદોલન સિવાય કોઈ વિકલ્પ બચ્યો નથી. નવા અધિનિયમ મુજબ, CAPF માં આઈ.જી. (IG) પદોના 50 ટકા, એ.ડી.જી. (ADG) પદોના 67 ટકા અને તમામ સ્પેશિયલ ડીજી તથા ડીજી પદો માત્ર આઈ.પી.એસ. (IPS) અધિકારીઓ માટે અનામત રાખવામાં આવ્યા છે, જેના કારણે કેડરના પોતાના અધિકારીઓની પ્રમોશનની તકો પર સીધી બ્રેક લાગી છે.

આ આંદોલનની પૃષ્ઠભૂમિમાં સુપ્રીમ કોર્ટનો અગાઉનો તે ઐતિહાસિક આદેશ પણ સામેલ છે, જેમાં કોર્ટે ગૃહ મંત્રાલયને બે વર્ષની અંદર દળોમાં આઈ.પી.એસ. અધિકારીઓનું ડેપ્યુટેશન ક્રમશઃ ઘટાડવા અને કેડર સમીક્ષા પૂર્ણ કરવા નિર્દેશ આપ્યો હતો. એસોસિએશનનો આરોપ છે કે અદાલતના આ આદેશનું પાલન કરવાને બદલે સરકારે નવો કાયદો ઘડીને વહીવટી સ્તરે આઈ.પી.એસ. અધિકારીઓનું વર્ચસ્વ કાયદેસર બનાવી દીધું છે. સૈનિકો અને અધિકારીઓના અનુભવ તથા કુશળતાને અવગણીને લેવાયેલા આ નિર્ણયોથી દળોમાં ભારે અસંતોષ વ્યાપ્યો છે.

હવે આગામી સમયમાં ૭ નવેમ્બરે યોજાનારી આ ભૂખ હડતાળ પહેલાં સરકાર આ મામલે કોઈ મધ્યમ માર્ગ કાઢે છે કે કેમ, તેના પર દેશભરના અર્ધલશ્કરી દળોના કર્મચારીઓની મીટ મંડાયેલી છે. આ વિરોધ પ્રદર્શન અર્ધલશ્કરી દળોના કર્મચારીઓની આંતરિક સુરક્ષા અને પ્રમોશનલ સમાનતા સાથે જોડાયેલી લડાઈને વધુ તીવ્ર બનાવશે તેવું સ્પષ્ટ દેખાઈ રહ્યું છે.