બેંગલુરુ: પાકિસ્તાનના ફેશન અને સુંદરતા જગતમાંથી એક મોટા સમાચાર સામે આવી રહ્યા છે, જેમાં પ્રતિષ્ઠિત 'મિસ યુનિવર્સ પાકિસ્તાન ૨૦૨૬' (Miss Universe Pakistan 2026) નો તાજ મનોવિજ્ઞાન (Psychology) ની હોશિયાર વિદ્યાર્થીની અને મોડેલ મિસ્બાહ અરશદના શિરેી શોભાયમાન થયો છે. ફિલિપાઇન્સમાં આયોજિત એક અત્યંત ભવ્ય અને આકર્ષક સમારોહ દરમિયાન ગત વર્ષની વિજેતા રોમા રિયાઝ દ્વારા મિસ્બાહને આ સુંદર તાજ પહેરાવવામાં આવ્યો હતો. આ ભવ્ય જીત બાદ મિસ્બાહ અરશદ આગામી ૨૪ નવેમ્બર, ૨૦૨૬ ના રોજ પ્યુઅર્ટો રિકોના સાન જુઆન ખાતે યોજાનારી વિશ્વપ્રસિદ્ધ ૭૫મી 'મિસ યુનિવર્સ ૨૦૨૬' ની વૈશ્વિક સ્પર્ધામાં સત્તાવાર રીતે પાકિસ્તાનનું પ્રતિનિધિત્વ કરવા માટે તૈયાર છે.

આ અંગે 'મિસ યુનિવર્સ પાકિસ્તાન ઓર્ગેનાઇઝેશન' દ્વારા સત્તાવાર સોશિયલ મીડિયા હેન્ડલ ઇન્સ્ટાગ્રામ પર એક વિશેષ પોસ્ટ શેર કરીને જણાવવામાં આવ્યું હતું કે, "નવી મિસ યુનિવર્સ પાકિસ્તાન ૨૦૨૬ મિસ્બાહ અરશદ છે. સુંદરતા, અદભુત આત્મવિશ્વાસ અને સ્પષ્ટ હેતુ સાથે, મિસ્બાહ હવે આંતરરાષ્ટ્રીય મંચ પર પાકિસ્તાનનું ગૌરવ વધારશે." સંગઠને વધુમાં ઉમેર્યું હતું કે આ વર્ષે આ સ્પર્ધા પોતાની હીરા વર્ષગાંઠ (Diamond Jubilee) ની ઉજવણી કરી રહી છે, ત્યારે આ વૈશ્વિક મંચ પર પાકિસ્તાનનો ચહેરો બનવું એ યુવતી માટે ગર્વની ક્ષણ છે.

મિસ્બાહ અરશદ માત્ર એક મોડેલ જ નથી, પરંતુ તે શિક્ષણના માધ્યમથી સમાજની છોકરીઓને આત્મનિર્ભર અને સશક્ત બનાવવામાં દ્રઢપણે માને છે. અગાઉ જુલાઈ ૨૦૨૬ માં વાયરલ થયેલા એક વીડિયોમાં તે લાહોરની એક સ્થાનિક શાળાની મુલાકાત લઈને વિદ્યાર્થીઓ સાથે વાતચીત કરતી પણ નજરે પડી હતી. તેણે અગાઉ પણ અનેક રાષ્ટ્રીય તથા આંતરરાષ્ટ્રીય સૌંદર્ય સ્પર્ધાઓમાં ભાગ લીધો છે, જેમાં જાપાનમાં આયોજિત 'મિસ ઇન્ટરનેશનલ ૨૦૨૩' નો પણ સમાવેશ થાય છે. અભ્યાસ અને મોડેલિંગ ઉપરાંત તેને નવી જગ્યાએ મુસાફરી કરવાનો અને ફેશન જગતને લગતી સામગ્રી (Content) બનાવવાનો ખૂબ જ શોખ છે.

આંતરરાષ્ટ્રીય સૌંદર્ય સ્પર્ધાઓમાં પાકિસ્તાની યુવતીઓની વધતી ભાગીદારી અને તેમની સફળતા ફેશન ઉદ્યોગમાં નવી ચર્ચા જગાવી રહી છે. હવે સૌની નજર આગામી નવેમ્બર મહિનામાં યોજાનારી ફાઇનલ સ્પર્ધા પર ટકેલી છે કે શું મિસ્બાહ આ વૈશ્વિક તાજ જીતવામાં સફળ રહે છે કે નહીં.