નવી દિલ્‍હી તા.૨૪: ખાંડ પછી, ડુંગળી હવે લોકોને રડાવી રહી છે. ગયા મહિનામાં, દેશના ઘણા ભાગોમાં ડુંગળીના ભાવ બમણા થઈ ગયા છે. શનિવારે, સરેરાશ ભાવ રૂા.૪૨ પ્રતિ કિલો પર પહોંચી ગયો, જે ગયા વર્ષ કરતા ૪૫% અને ગયા મહિનાથી ૧૯% વધુ છે. ગ્રાહક બાબતોના વિભાગના આંકડા અનુસાર, દિલ્‍હીમાં ડુંગળીનો છૂટક ભાવ  રૂા. ૬૫ પ્રતિ કિલો પર પહોંચી ગયો છે, જે એક વર્ષ પહેલા  રૂા. ૩૫ હતો. તેવી જ રીતે, ચેન્નાઈમાં, ડુંગળીના ભાવ  રૂા. ૫૮ પ્રતિ કિલો પર વેચાઈ રહ્યા છે, જે ગયા વર્ષે  રૂા. ૩૩ હતા. કેરળ અને આસામના કેટલાક ભાગોમાં પણ ડુંગળીના ભાવ ઊંચા છે.

મીડિયા અહેવાલો અનુસાર, દેશના સૌથી મોટા ડુંગળી બજાર નાસિકમાં ગયા મહિનામાં ભાવ ૭૬ ટકા વધ્‍યા છે. ડુંગળીના ભાવમાં વધારા માટે અનેક કારણો દર્શાવવામાં આવી રહ્યા છે. અનિﾍતિ ચોમાસાને કારણે વાવણીમાં વિલંબ, ઓછી આવક અને સરકારી ખરીદીમાં ઘટાડો થવાને કારણે ડુંગળીના ભાવમાં વધારો થયો છે. સંગ્રહખોરોએ મુશ્‍કેલીઓમાં વધારો કર્યો છે.

ડુંગળીના વધતા ભાવને રોકવા માટે, સરકારે બજારમાં બફર સ્‍ટોક છોડવાનો નિર્ણય લીધો છે. આજથી, કેન્‍દ્ર સરકાર નાસિકથી દિલ્‍હી, ચેન્નાઈ, કોચી અને ગુવાહાટી માટે કાંદા  એક્‍સપ્રેસ ચલાવશે. આ વિસ્‍તારોમાં ડુંગળીના ભાવ રાષ્ટ્રીય સરેરાશ કરતા વધારે છે. અધિકારીઓ કહે છે કે ડુંગળી ઓછી કિમતે ઉપલબ્‍ધ કરાવવામાં આવશે.

અધિકારીઓનું કહેવું છે કે સરકાર અને ખેડૂતો બંને પાસે આગામી મહિનાઓમાં ડુંગળીની માંગને પહોંચી વળવા માટે પૂરતો સ્‍ટોક છે. બજાર નિષ્‍ણાતો કહે છે કે દેશમાં સૌથી મોટું ડુંગળી ઉત્‍પાદક મહારાષ્ટ્રમાં ખરીફ ડુંગળીના ઉત્‍પાદનમાં ૫-૭% ઘટાડો થવાના અહેવાલોને કારણે ભાવમાં વધારો થયો છે.

સામાન્‍ય રીતે ઓગસ્‍ટ અને સપ્‍ટેમ્‍બરમાં ડુંગળીના ભાવ વધે છે. આનું કારણ એ છે કે રવિ પાકનો સ્‍ટોક ઓછો થવા લાગે છે, જ્‍યારે ખરીફ પાક આવવામાં સમય લાગે છે. આનાથી ભાવ પર દબાણ આવે છે. આ વખતે ખરાબ હવામાન અને મોડી વાવણીએ આગમાં ઘી ઉમેર્યું છે. એક મહિના પહેલા, નાસિક બજારમાં ડુંગળીના ભાવ પ્રતિ ક્‍વિન્‍ટલ  રૂા.૨,૦૫૦ હતા, પરંતુ હવે તે  રૂા.૩,૬૦૦ થી વધુ પહોંચી ગયા છે.(૩૮