જયપુર, તા.૨૪: રાજસ્થાનમાં સરકારી શાળાઓની ભયાનક અને જર્જરિત સ્થિતિ પરથી પડદો ઊંચકાતાં જ રાજ્યનું રાજકારણ ગરમાયું છે. 'વંદો જનતા પાર્ટી' (CJP) ના કાર્યકરોએ રાજસ્થાનના રામપુરા વિસ્તારમાં સરકારી શાળાની મુલાકાત લઈને માળખાકીય સુવિધાઓ અંગે ગંભીર પ્રશ્નો ઉઠાવ્યા હતા. CJP ના આ આક્રમક અભિયાન બાદ રાજ્ય સરકાર તાત્કાલિક હરકતમાં આવી છે અને રાજ્યની શાળાઓનો કાયાકલ્પ કરવા માટે ₹૧૨,૦૦૦ કરોડથી વધુનું વિશાળ ભંડોળ મંજૂર કરી દીધું છે.

ચૂંટણી નજીક આવતાં જ સરકાર સતર્ક: ૩ વર્ષનો માસ્ટર પ્લાન રજૂ
આગામી સ્થાનિક સંસ્થાની ચૂંટણીઓ નજીક આવી રહી છે ત્યારે વિપક્ષ અને CJP એ શિક્ષણના મુદ્દાને મુખ્ય એજન્ડા બનાવી લીધો છે. મીડિયા રિપોર્ટ્સ અનુસાર, રાજસ્થાન સરકારે શનિવારે એક વિશેષ આદેશ જારી કરીને ૩ વર્ષીય યોજના રજૂ કરી છે. આ યોજના હેઠળ કુલ ₹૧૨,૫૦૦ કરોડ ખર્ચવામાં આવશે, જેમાંથી ₹૩,૦૦૦ કરોડથી વધુની રકમ સરકારે પહેલાથી જ મંજૂર કરી દીધી હોવાનો દાવો કર્યો છે.

CJP ના પ્રચારે વધારી સરકારની ચિંતા
અહેવાલો મુજબ, ભારતીય જનતા પાર્ટીના એક વરિષ્ઠ નેતાએ સ્વીકાર્યું હતું કે, "CJP દ્વારા નાગરિકોને સરકારી શાળાઓની મુલાકાત લેવા અને તેમની સ્થિતિનું દસ્તાવેજીકરણ કરવાની અપીલ કરવામાં આવી હતી. ત્યારબાદ કૉંગ્રેસ સહિતના વિપક્ષી પક્ષોએ શાળાના માળખાકીય મુદ્દાઓ પર રાજકીય ઘેરાબંધી શરૂ કરી દીધી હતી. જો સરકારે આ મુદ્દા પર તાત્કાલિક પ્રતિભાવ ન આપ્યો હોત, તો સ્થાનિક ચૂંટણીઓ પહેલા વિપક્ષને મોટો રાજકીય મુદ્દો મળી ગયો હોત."

બજેટનું ગાણિતિક ચિત્ર: શું-શું બનશે?
રાજસ્થાન સરકારે જારી કરેલા રોડમેપ મુજબ સમગ્ર રાજ્યની શાળાઓને નવજીવન આપવા માટે નીચે મુજબનું આયોજન કરવામાં આવ્યું છે:

•    નવી શાળા ઇમારતો: ₹૨,૪૮૭.૭ કરોડના ખર્ચે ૩,૫૮૭ નવી શાળા ઇમારતોનું નિર્માણ થશે.

•    નવા વર્ગખંડો: ₹૮,૩૭૮.૩ કરોડના ભંડોળથી ૮૩,૭૮૩ નવા ક્લાસરૂમ તૈયાર કરાશે.

•    શાળાઓનું સમારકામ: ૨૨,૫૮૯ જૂની શાળાઓના રિનોવેશન માટે ₹૧,૧૨૯.૫ કરોડ ખર્ચાશે.

•    શૌચાલય સંકુલ: ૧૩,૬૧૬ શાળાઓમાં શૌચાલય બનાવવા માટે ₹૩૪૦.૪ કરોડ ફાળવાયા છે.

રામપુરા શાળાથી ૧ સપ્ટેમ્બરથી નિર્માણ કાર્યનો પ્રારંભ
જે રામપુરા (કંવરપુરા) વિસ્તારમાં CJP ના પ્રચાર દરમિયાન હોબાળો થયો હતો, તે સાંગાનેર બ્લોકની પ્રાથમિક શાળા માટે સરકારે વિશેષ ₹૧૮ લાખ મંજૂર કર્યા છે. આ રકમમાં જિલ્લા ખનિજ ફાઉન્ડેશન ટ્રસ્ટ (DMFT) માંથી ₹૧૨ લાખ અને સ્થાનિક ધારાસભ્ય ભંડોળમાંથી ₹૬ લાખનો સમાવેશ થાય છે.

ઉલ્લેખનીય છે કે, સપ્ટેમ્બર ૨૦૨૫ માં થયેલા ટેકનિકલ સર્વેક્ષણ બાદ આ શાળાની ઇમારતને અત્યંત જર્જરિત અને ભયજનક જાહેર કરીને બંધ કરી દેવામાં આવી હતી. હવે અહીં ૧ સપ્ટેમ્બરથી નવી શાળા ઇમારતનું બાંધકામ યુદ્ધના ધોરણે શરૂ કરવામાં આવશે.