​નાગપુર: મહારાષ્ટ્રના નાગપુર શહેર નજીક આવેલા ગોધની વિસ્તારમાં મહારાષ્ટ્ર જીવન પ્રાધિકરણ (MJP) ના વોટર પ્યુરિફિકેશન પ્લાન્ટ (જલ શુદ્ધિકરણ કેન્દ્ર) ખાતેથી અચાનક ઝેરી ક્લોરિન ગેસનું લીકેજ થતાં ભારે અફરાતફરી મચી ગઈ છે. ક્લોરિન વાયુ ઝડપથી આસપાસના રહેણાંક વિસ્તારોમાં ફેલાઈ જતાં સ્થાનિક નાગરિકોને આંખોમાં બળતરા, અસહ્ય ઉધરસ અને શ્વાસ લેવામાં ગંભીર તકલીફો ઊભી થઈ હતી.

​આ બનાવની જાણ થતાં જ ફાયર બ્રિગેડ, પોલીસ અને ડિઝાસ્ટર મેનેજમેન્ટની ટીમ ઘટનાસ્થળે પહોંચી ગઈ હતી. ગેસ ગળતરની અસર હેઠળ આવેલા અનેક સ્થાનિક રહીશોને તાત્કાલિક સારવાર અર્થે નજીકની હોસ્પિટલોમાં દાખલ કરવામાં આવ્યા છે. ઝેરી ગેસના વાદળો પ્રસરતા જ સમગ્ર ગોધની અને નજીકના વિસ્તારોમાં ભય અને દહેશતનો માહોલ સર્જાયો હતો.

​તંત્ર દ્વારા ગેસ લીકેજને અટકાવવા માટે રાહત અને બચાવ કામગીરી યુદ્ધના ધોરણે હાથ ધરવામાં આવી છે. ફાયર બ્રિગેડના કર્મચારીઓએ વિશિષ્ટ સુરક્ષા કિટ પહેરીને લીકેજ સ્ત્રોતને બંધ કરવાના પ્રયાસો શરુ કર્યા છે. પ્રશાસન દ્વારા આસપાસના લોકોને સાવચેતીના ભાગરૂપે પોતાના ઘરોના દરવાજા-બારીઓ બંધ રાખવા અને માસ્ક અથવા ભીના રૂમાલનો ઉપયોગ કરવાની સલાહ આપવામાં આવી છે.