મુંબઈ, તા.24: રાજ્ય સરકાર દ્વારા ઓટો-રિક્ષા અને ટેક્સી ચાલકો માટે ફરજિયાત બનાવવામાં આવેલી મરાઠી ભાષાની શરતનો વિરોધ કરવા માટે સોમવારે ઓટો-રિક્ષા ચાલકોના એક જૂથે મુંબઈના કાંદિવલી સ્થિત ન્યૂ લિંક રોડ પર પોતાના વાહનો રોકીને વિરોધ પ્રદર્શન કર્યું હતું. આ વિરોધના કારણે લિંક રોડ પર અચાનક ભારે ટ્રાફિક જામની સ્થિતિ સર્જાઈ હતી અને લગભગ 20 મિનિટ સુધી વાહનવ્યવહાર ધીમો પડી જતાં સામાન્ય મુસાફરો તથા વાહનચાલકોને મોટી અસુવિધાનો સામનો કરવો પડ્યો હતો. પરિસ્થિતિ વણસતી જોઈને ટ્રાફિક પોલીસની ટીમ ઘટનાસ્થળે પહોંચી હતી અને રસ્તો ખાલી કરાવીને ટ્રાફિક પૂર્વવત કરાવ્યો હતો.

આ વિરોધ પ્રદર્શન દરમિયાન કેટલાક બિન-મરાઠી ભાષી ચાલકો દ્વારા રસ્તો બ્લોક કરવાનો અને મુસાફરોને લઈ જતા અન્ય રિક્ષાચાલકોને ધમકાવવાનો આરોપ પણ સામે આવ્યો છે. ઉલ્લેખનીય છે કે, આ વિરોધ એવા સમયે થયો છે જ્યારે મહારાષ્ટ્ર આરટીઓ (RTO) દ્વારા ઓટો અને ટેક્સી ડ્રાઇવરોનું વ્યવહારુ મરાઠી જ્ઞાન ચકાસવા માટે રાજ્યવ્યાપી કડક અભિયાન ચલાવવામાં આવી રહ્યું છે.

આરટીઓ દ્વારા હાથ ધરાયેલી બે દિવસીય કવાયતના ડેટા મુજબ રાજ્યભરમાં 9,233 થી વધુ ડ્રાઇવરોનું મૂલ્યાંકન કરવામાં આવ્યું છે, જેમાંથી મરાઠીનું વ્યવહારુ જ્ઞાન ન ધરાવતા 1,921 થી વધુ ડ્રાઇવરોને નોટિસ ફટકારવામાં આવી છે. એકલા મુંબઈ મેટ્રોપોલિટન રિજન (MMR) માં જ 3,942 ડ્રાઇવરોમાંથી 722 ચાલકો મરાઠી ભાષાની ચકાસણીમાં નિષ્ફળ જતાં તેમને નોટિસ પાઠવવામાં આવી છે.

આ કસોટીમાં ડ્રાઇવરોની લખવા-વાંચવાની ક્ષમતાને બદલે દૈનિક મુસાફરી દરમિયાન મુસાફરો સાથે મરાઠીમાં વાતચીત કરવાની વ્યવહારુ ક્ષમતાનું મૂલ્યાંકન કરવામાં આવી રહ્યું છે.