ક્વાલાલંપુર, તા.24: મલેશિયન પ્રોફેસર ડૉ. સોલેહા યાકોબ મલય ઇતિહાસ અને પ્રાચીન સભ્યતા વિશે કરેલા વિચિત્ર અને અપરંપરાગત દાવાઓને કારણે વિવાદોના વંટોળમાં ઘેરાયા છે. તેમના વાયરલ વિવાદ બાદ ઇન્ટરનેશનલ ઇસ્લામિક યુનિવર્સિટી મલેશિયા (International Islamic University Malaysia - IIUM) એ મોટી કાર્યવાહી કરતા તેમને શૈક્ષણિક સેવામાંથી તુરંત બરતરફ કરી દીધા છે.

યુનિવર્સિટી દ્વારા જારી કરાયેલા અધિકૃત નિવેદન મુજબ, ભાષાશાસ્ત્રના પૂર્વ પ્રોફેસર સોલેહા યાકોબને 27 એપ્રિલથી જ સેવામાંથી મુક્ત કરી દેવાયા હતા. સંસ્થાએ સ્પષ્ટ કર્યું છે કે તેઓ હવે IIUM નું પ્રતિનિધિત્વ કરતા નથી અને પોતાની સોશિયલ મીડિયા પોસ્ટ્સ, મીડિયા સામગ્રી કે પ્રકાશનોમાં યુનિવર્સિટીના નામ કે હોદ્દાનો ઉપયોગ કરવા માટે હકદાર નથી.

ડૉ. સોલેહાએ તાજેતરમાં ઇન્ટરનેટ પર દાવો કર્યો હતો કે પ્રાચીન સમયના મલય લોકો હવામાં ઉડી શકતા હતા અને તેમણે જ ચીની લોકોને "ફ્લાઇંગ કુંગ ફૂ" શીખવ્યું હતું. આ ઉપરાંત, તેમણે એવો સિદ્ધાંત પણ રજૂ કર્યો હતો કે પ્રાચીન રોમન સામ્રાજ્યના લોકો મલય વિશ્વ પાસેથી જહાજ નિર્માણની ટેકનિક શીખતા હતા. આ પ્રકારના દાવાઓ વાયરલ થતાં વૈશ્વિક શૈક્ષણિક સ્તરે મોટો વિવાદ ઊભો થયો હતો.

બીજી તરફ, પ્રોફેસર સોલેહા યાકોબે યુનિવર્સિટીના આ નિર્ણયનો વિરોધ કરતાં તેને ગેરકાયદે ગણાવ્યો છે. તેમણે દાવો કર્યો કે યુનિવર્સિટીએ તેમને અપીલ કરવાની તક આપ્યા વિના 24 કલાકમાં જ નોકરીમાંથી કાઢી મૂક્યા છે. તેઓ આ બરતરફી વિરુદ્ધ ઇન્ડસ્ટ્રિયલ કોર્ટમાં કાનૂની કાર્યવાહી દ્વારા પડકાર ફેંકવાની તૈયારી કરી રહ્યા છે.