ગુરુગ્રામ : હરિયાણાના ગુરુગ્રામમાં સોમવારે થયેલા ભારે મુશળધાર વરસાદે સમગ્ર શહેરનું જનજીવન અસ્તવ્યસ્ત કરી નાખ્યું છે. અવિરત વરસાદના કારણે શહેરના તમામ મુખ્ય રસ્તાઓ, હાઇવે અને રહેણાંક સોસાયટીઓ જળબંબાકાર થઈ ગઈ હતી. રસ્તાઓ નદીઓમાં ફેરવાઈ જતાં ઉદ્ભવેલી ભયાનક પરિસ્થિતિને ધ્યાનમાં રાખીને ગુરુગ્રામ જિલ્લા આપત્તિ વ્યવસ્થાપન સત્તામંડળે આગામી દિવસ મંગળવાર, 25 ઓગસ્ટના રોજ તમામ સરકારી તથા ખાનગી કોર્પોરેટ ઓફિસો, શાળાઓ અને શૈક્ષણિક સંસ્થાઓ માટે વર્ક ફ્રોમ હોમ (Work From Home) ની કડક સૂચના જારી કરી છે.

તંત્ર દ્વારા જારી કરાયેલી એડવાઈઝરી મુજબ, કર્મચારીઓને ઘરેથી કામ કરવાની સલાહ એટલા માટે આપવામાં આવી છે જેથી રસ્તાઓ પર વાહનોનો ભીડભાડ ઓછી થાય. આનાથી નાગરિક એજન્સીઓ (Municipal Agencies) માટે રસ્તાઓ અને ગટરોમાંથી પાણીના નિકાલ (Drainage Work) તેમજ સમારકામનું કામ ઝડપથી કરવું સરળ બનશે.

ડ્રેનેજ સિસ્ટમની પોલ ખુલી, મુખ્ય માર્ગો પર પૂર જેવો માહોલ

ભારે વરસાદથી ગુરુગ્રામની ડ્રેનેજ વ્યવસ્થાના દાવાઓ સંપૂર્ણપણે ખોખલા સાબિત થયા છે. શહેરના સેક્ટર 10, સાઉથ સિટી-1, સેક્ટર 69, નરસિંહપુર, સેક્ટર 9, 14, 45, DLF ફેઝ 3 અને સોહના રોડ પર આવેલ એરિયા મોલ નજીક ૨ થી ૩ ફૂટ ઊંડા પાણી ભરાઈ ગયા હતા. ગોલ્ફ કોર્સ રોડથી લઈને જૂના શહેરના મુખ્ય માર્ગો પર પૂર જેવી ગંભીર સ્થિતિ જોવા મળી હતી.

કિલોમીટરો સુધી ટ્રાફિક જામ, વાહનો ફસાયા

રસ્તાઓ પાણીમાં ગરકાવ થઈ જતાં દિલ્હી-જયપુર એક્સપ્રેસવે, સોહના રોડ, ઓલ્ડ દિલ્હી રોડ અને રેલ્વે રોડ પર વાહનોની લાંબી કતારો લાગી ગઈ હતી. રાજીવ ચોક ફ્લાયઓવર અને અંડરપાસ આસપાસ વાહનો કલાકો સુધી ફસાયેલા રહ્યા હતા. સ્થિતિને નિયંત્રિત કરવા માટે ટ્રાફિક પોલીસ અને સ્થાનિક પોલીસ ટીમોને તૈનાત કરવામાં આવી છે અને કેટલાક રૂટ ડાયવર્ટ કરવાની પણ કવાયત હાથ ધરવામાં આવી છે.

હવામાન વિભાગે ગુરુગ્રામ અને ફરીદાબાદ સહિત સમગ્ર એનસીઆર (NCR) વિસ્તારમાં આગામી કલાકોમાં વાવાઝોડા સાથે વધુ ભારે વરસાદની ચેતવણી જારી કરી છે.