સાન ફ્રાન્સિસ્કો: મોટા પગારની કોર્પોરેટ નોકરી અને લાખો ડોલરનો સ્ટોક ઓપ્શન છોડીને પોતાના દિલનું સાંભળવું દરેક માટે શક્ય નથી હોતું. પરંતુ ૪૦ વર્ષીય જેસન શેને સાબિત કરી બતાવ્યું છે કે ખરી સફળતા ડોલરના આંકડાઓમાં નહીં, પણ પોતાના સમય પરના નિયંત્રણમાં છે. મેટા (Meta) કંપનીમાં સિનિયર પ્રોડક્ટ મેનેજર તરીકે વાર્ષિક $૨૫૦,૦૦૦ (અંદાજે ₹૨.૩ કરોડ) નો મસમોટો પગાર અને $૧.૭ મિલિયનના અનવેસ્ટેડ શેર્સ છોડીને તેમણે સ્ટાર્ટઅપ ફાઉન્ડર્સને કોચિંગ આપવાનો એક અનોખો માર્ગ પસંદ કર્યો.

કોર્પોરેટ સંસ્કૃતિમાં સતત મીટિંગો, આંતરિક રાજકારણ, દસ્તાવેજોની સમીક્ષા અને ટીમ રી-ઓર્ગેનાઇઝેશનથી તંગ આવી ગયેલા જેસનને સમજાયું કે તે આવનારા ૨૦ વર્ષ આ રીતે વિતાવી શકે તેમ નથી. પોતાના જુસ્સાને આગળ ધપાવવા તેમણે અગાઉથી જ $૧૫૦,૦૦૦ (અંદાજે ₹૧.૨૬ કરોડ) નું નાણાકીય ભંડોળ બચાવી લીધું હતું. જૂન ૨૦૨૩ માં મેટાને રામ-રામ કર્યા બાદ, ૨૦૨૪ ની શરૂઆતમાં તેમણે 'રિફેક્ટર લેબ્સ' ની સ્થાપના કરી, જે સ્ટાર્ટઅપના સહ-સ્થાપકો  વચ્ચેના મતભેદો ઉકેલવા અને બિઝનેસ કોચિંગ આપવાનું કામ કરે છે.

જેસનની આ જોખમી છતાં વિચારપૂર્વકની શરત રંગ લાવી. છેલ્લા ૧૨ મહિનામાં તેમની કંપનીએ $૩૬૯,૦૦૦ (અંદાજે ₹૩.૧ કરોડ) ની આવક મેળવી છે. સૌથી રસપ્રદ વાત એ છે કે હવે તેઓ અઠવાડિયામાં માત્ર ૨૦ કલાક કામ કરે છે, જેમાંથી મોટાભાગનું કામ ઝૂમ કોલ્સ દ્વારા થાય છે અને એડમિનિસ્ટ્રેટિવ કામમાં AI ટૂલ્સ તેમની મદદ કરે છે. આ ફેરફારથી તેમને માત્ર નાણાકીય સ્વતંત્રતા જ નહીં, પરંતુ પોતાની પુત્રી સાથે રમતના મેદાનમાં સમય વિતાવવા, ફિટનેસ સુધારવા અને પોતાની આગામી પુસ્તક લખવા માટે પૂરતો સમય મળી રહ્યો છે.