નવી દિલહી, તા.૨૫: દેશમાં ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) દ્વારા ગ્રાહકોને ગેરમાર્ગે દોરતી જાહેરાતો અને પેકેજિંગ લેબલિંગ વિરુદ્ધ આકરાં પગલાં લેવામાં આવ્યા છે. નિયમનકારી કાર્યવાહીના પગલે બોર્નવિટા બનાવતી પ્રખ્યાત કંપની મોન્ડેલેઝ ઈન્ડિયા અને ડાયરેક્ટ સેલિંગ બ્રાન્ડ એમવે ઈન્ડિયા (Amway India) એ પોતાના પ્રોડક્ટ્સ પર કરવામાં આવતા કેટલાક વિવાદિત દાવાઓ અને જાહેરાતો સ્વેચ્છાએ પાછી ખેંચી લીધી છે અથવા તેમાં સુધારા કર્યા છે.

બોર્નવિટા (Bournvita) ના કિસ્સામાં, તેના પીણાના પોષણ મૂલ્ય (Nutritional Value) અને આરોગ્ય સંબંધિત દાવાઓ પર FSSAI એ પ્રશ્નો ઉઠાવ્યા હતા. નિયમનકારનું માનવું હતું કે પ્રમોશનલ ભાષા ગ્રાહકોમાં ઉત્પાદનના સ્વાસ્થ્ય લાભો વિશે ભ્રામક છાપ ઉભી કરી શકે છે. FSSAI ની નોટિસ બાદ મોન્ડેલેઝ ઈન્ડિયાએ તે તમામ ભ્રામક દાવાઓ અને તેને લગતી જાહેરાતો પર તાત્કાલિક અસરથી રોક લગાવી દીધી છે.

બીજી તરફ, એમવે ઈન્ડિયા તેના નાળિયેર તેલના ઉત્પાદન પર "૧૦૦% શુદ્ધ નાળિયેર તેલ" લખવા બદલ FSSAI ની રડારમાં આવી હતી. નિયમનકાર અનુસાર, આ દાવો ફૂડ સેફ્ટી એન્ડ સ્ટાન્ડર્ડ્સ એક્ટ, ૨૦૦૬ ની જોગવાઈઓનું ઉલ્લંઘન કરે છે, જેમાં ખાદ્ય ઉત્પાદનો પર '૧૦૦' શબ્દના ઉપયોગ પર મનાઈ ફરમાવવામાં આવી છે. કાનૂની કાર્યવાહી બાદ એમવેએ તેના પ્રોડક્ટ પેકેજિંગ અને પ્રમોશનલ મટીરિયલમાંથી '૧૦૦%' શબ્દ હટાવી લીધો છે અને બજારમાંથી જૂનો સ્ટોક પાછો ખેંચવાની ખાતરી આપી છે.

એમવે કંપની દ્વારા સુધારેલા પેકેજિંગને આખરી ઓપ આપી દેવામાં આવ્યો છે અને હાલ તેનું ઉત્પાદન પ્રક્રિયામાં છે. નવું સુધારેલું પેકિંગ સપ્ટેમ્બર-ઓક્ટોબર ૨૦૨૬ થી તબક્કાવાર રીતે માર્કેટમાં ઉપલબ્ધ થશે અને કંપની પોતાની સત્તાવાર વેબસાઈટ પરથી પણ આ વિવાદિત દાવાઓ દૂર કરશે. FSSAI એ સ્પષ્ટ કર્યું છે કે ગ્રાહકોના સ્વાસ્થ્ય અને તેમના અધિકારોના રક્ષણ માટે ખાદ્ય પદાર્થોની જાહેરાતો પર આવી તપાસ સતત ચાલુ રહેશે.