નવી દિલ્હી, તા.૨૫: રામ મંદિર દાનમાં થયેલી કથિત ગેરરીતિઓ અને કૌભાંડો પર તપાસાત્મક રિપોર્ટિંગ કરનાર જાણીતા પત્રકાર અભિષેક ઉપાધ્યાયને સર્વોચ્ચ અદાલત તરફથી મોટી રાહત મળી છે. ઉત્તર પ્રદેશ પોલીસ દ્વારા ગાઝિયાબાદમાં નોંધાયેલી કથિત રોડ-રેજ ઘટના સંબંધિત એફઆઈઆર (FIR) મામલે સુપ્રીમ કોર્ટે પત્રકારની ધરપકડ અને કોઈ પણ બળજબરીપૂર્વકની કાર્યવાહી સામે વચગાળાનો સ્ટે આપ્યો છે. આ રક્ષણ યુપી પોલીસ દ્વારા તેમની સામે ભવિષ્યમાં નોંધવામાં આવનારી કોઈપણ નવી એફઆઈઆર પર પણ સમાન રીતે લાગુ પડશે.

ભારતના મુખ્ય ન્યાયાધીશ (CJI) સૂર્યકાંત, જસ્ટિસ જોયમલ્યા બાગચી અને જસ્ટિસ વી. મોહનાની બનેલી ખંડપીઠે ગાઝિયાબાદ પોલીસને ઇન્દિરાપુરમ પોલીસ સ્ટેશનમાં નોંધાયેલી એફઆઈઆરની નકલ તાત્કાલિક પત્રકારને પૂરી પાડવા આદેશ આપ્યો છે. આ સાથે ગાઝિયાબાદના પોલીસ કમિશનરને આગામી સુનાવણી ૭ સપ્ટેમ્બર સુધીમાં આ આદેશના પાલનનો અહેવાલ કોર્ટ સમક્ષ રજૂ કરવા જણાવવામાં આવ્યું છે.

કોર્ટમાં પત્રકારના વરિષ્ઠ વકીલ પ્રદીપ રાયે દલીલ કરી હતી કે આ કેસ સંપૂર્ણપણે બનાવટી અને ઉપજાવી કાઢેલા આરોપો પર આધારિત છે. તેમણે ગંભીર આરોપ લગાવ્યો હતો કે પત્રકારે રામ મંદિર દાન વિવાદ સહિતના સંવેદનશીલ મુદ્દાઓ પર નિષ્પક્ષ કવરેજ કર્યું હોવાથી તેને નિશાન બનાવીને હેરાન કરવામાં આવી રહ્યો છે. બચાવ પક્ષે ઘટનાસ્થળના સીસીટીવી ફૂટેજ સુરક્ષિત રાખવાની માંગ કરી હતી જેથી સત્ય સામે આવી શકે.

પત્રકાર અભિષેક ઉપાધ્યાય અનુસાર, તેઓ જ્યારે પોતાની પુત્રીને શાળાએથી લઈને પરત ફરી રહ્યા હતા ત્યારે શિપ્રા મોલ નજીક કોઈ અથડામણ થઈ નહોતી, માત્ર એક મોટરસાઇકલ ચાલક કાર નજીક આવ્યો હતો. તેમણે એફઆઈઆરમાં દર્શાવેલા મોટરસાઇકલ નંબર અને પોલીસ દ્વારા દુકાનદારો પર સીસીટીવી માટે કરાતા દબાણ સામે પણ સવાલો ઉઠાવ્યા છે. આ મામલે એફઆઈઆર રદ કરવા અને સીબીઆઈ (CBI) જેવી સ્વતંત્ર એજન્સી પાસે તપાસ કરાવવાની માંગ કરવામાં આવી છે. સુપ્રીમ કોર્ટે આ અંગે ઉત્તર પ્રદેશ સરકારને નોટિસ જારી કરીને વધુ સુનાવણી ૭ સપ્ટેમ્બરના રોજ નિયત કરી છે.