મુઝફ્ફરાબાદ, તા.૨૫: પાકિસ્તાન શાસિત કાશ્મીર (PoK) માં પાકિસ્તાની સેના અને સરકાર સામે જનતાનો આક્રોશ હવે ચરમસીમાએ પહોંચ્યો છે. પ્રદેશમાં સતત વધી રહેલા અસંતોષ વચ્ચે સંયુક્ત આવામી એક્શન કમિટી (JAAC) એ પાકિસ્તાની હકુમત વિરુદ્ધ આંદોલનના એક નવા અને વધુ આક્રમક તબક્કાની જાહેરાત કરી છે. રાઉલાકોટ ખાતે યોજાયેલી બેઠકમાં કમિટીએ પાકિસ્તાન સરકાર દ્વારા કરવામાં આવતા માનવાધિકારના ભંગ, શિક્ષણ અને આરોગ્ય સુવિધાઓની દુર્દશા તેમજ શાંતિપૂર્ણ પ્રદર્શનકારીઓની ગેરકાયદેસર અટકાયતો સામે આરપારની લડાઈનું બ્યુગલ ફૂંક્યું છે.

નવા આંદોલનની શરૂઆત ૨૬ ઓગસ્ટના રોજ "ક્રાંતિના પયગંબર પરિષદ" થી થશે, જેમાં ધાર્મિક વિદ્વાનો જુલમ, શોષણ અને અજ્ઞાનતા સામે અવાજ ઉઠાવશે. ત્યારબાદ ૨૯ ઓગસ્ટે "મારા માટે આરોગ્ય અને શિક્ષણ કેમ નહીં?" ના નારા સાથે શાળાઓ, કોલેજો, યુનિવર્સિટીઓ અને હોસ્પિટલોની કથિત આંતરિક ખામીઓ સામે પ્રચંડ વિરોધ પ્રદર્શનો યોજાશે. JAAC એ ખાસ કરીને મહિલાઓ અને વિદ્યાર્થીઓને ગણવેશમાં આવીને આ પ્રદર્શનોમાં જોડાવા હાકલ કરી છે અને સ્પષ્ટ કર્યું છે કે માંગણીઓ પૂરી ન થાય ત્યાં સુધી તેમનો શાંતિપૂર્ણ સંઘર્ષ ચાલુ રહેશે.

આ આંદોલનનો મુખ્ય મુદ્દો પાકિસ્તાની ગુપ્તચર એજન્સીઓ દ્વારા સ્થાનિક નાગરિકોને બળજબરીથી ગાયબ કરવા અને અટકાયતમાં લેવાનો છે. JAAC એ ઝિયા-ઉલ-મલિક, ફૈઝલ મનશા અને મોહમ્મદ બિલાવલ જેવા સભ્યોને તાત્કાલિક મુક્ત કરવાની માંગ કરી છે. આ ઉપરાંત, કોર કમિટીના અગ્રણી નેતા શૌકત નવાઝ મીરની ગેરકાયદેસર અટકાયત સામે વિરોધ નોંધાવીને તેમને કોર્ટ સમક્ષ રજૂ કરવા અને પરિવારોને મળવા દેવાની અપીલ કરાઈ છે. રાવલપિંડી અને ઇસ્લામાબાદમાં પકડાયેલા વિદ્યાર્થીઓ અને મહિલાઓને પણ મુક્ત કરવાની માંગણી જોર પકડી રહી છે.

પાકિસ્તાન સરકાર પર PoK માં ખોરાક અને દવાનો પુરવઠો રોકવાનો અને પંજાબ પોલીસ દ્વારા ટ્રાન્સપોર્ટરો પાસેથી નાણાં ઉઘરાવવાનો પણ ગંભીર આરોપ મૂકવામાં આવ્યો છે. આ આંદોલનને હવે આંતરરાષ્ટ્રીય સ્તરે લઈ જવા માટે JAAC એ વિદેશમાં રહેતા કાશ્મીરીઓને ૩૦ ઓગસ્ટના રોજ લંડનમાં યોજાનારી 'મિલિયન માર્ચ' માં ભાગ લેવા અને બ્રિટિશ સાંસદો સમક્ષ પાકિસ્તાની અત્યાચારોનો પર્દાફાશ કરવા આહ્વાન કર્યું છે.