ઓટાવા, તા.૨૫: અમેરિકાના પ્રમુખ ડોનાલ્ડ ટ્રમ્પ દ્વારા લાદવામાં આવેલા આકરા ટેરિફ અને કડક ઇમિગ્રેશન નીતિઓ સામે કેનેડાએ હવે બહેરી જંગ છેડી દીધી છે. વડા પ્રધાન માર્ક કાર્નેની સરકારે માત્ર "ડોલર સામે ડોલર" ની નીતિ અપનાવીને અમેરિકી સ્ટીલ, ઇલેક્ટ્રોનિક્સ અને અન્ય ઉત્પાદનો પર ટેરિફ લાદવાની તૈયારી જ નથી કરી, પરંતુ અમેરિકાના આર્થિક કરોડરજ્જુ સમાન ગણાતા ઉચ્ચ કુશળ વિદેશી કામદારો, સંશોધકો અને H-1B વિઝા ધારકોને આકર્ષવા માટે એક નવી અને મજબૂત રણનીતિ પણ તૈયાર કરી છે.

કેનેડાના ઇમિગ્રેશન, રીફ્યુજીસ અને સિટીઝનશીપ વિભાગ (IRCC) એ "ટેલેન્ટ એટ્રેક્શન સ્ટ્રેટેજી" (Talent Attraction Strategy) ની જાહેરાત કરી છે. આ વ્યૂહરચના હેઠળ આર્ટિફિશિયલ ઇન્ટેલિજન્સ (AI), આરોગ્યસંભાળ, અદ્યતન ઉત્પાદન અને સંશોધન જેવા ક્ષેત્રોના નિષ્ણાતોને ઝડપી વર્ક પરમિટ અને કાયમી વસવાટ (PR) ના સુગમ માર્ગો પૂરા પાડવામાં આવશે. વિશેષ રૂપે, યુએસમાં અનિશ્ચિતતાનો સામનો કરી રહેલા H-1B વિઝા ધારકો માટે કેનેડા એક નવો ઝડપી ઇમિગ્રેશન માર્ગ બનાવી રહ્યું છે. નોંધનીય છે કે અગાઉ ૨૦૨૩ માં કેનેડાએ H-1B ધારકો માટે ઓપન વર્ક પરમિટ યોજના શરૂ કરી હતી, જે માત્ર ૨૪ કલાકથી ઓછા સમયમાં ૧૦,૦૦૦ ની મર્યાદા પૂરી કરી ગઈ હતી, જે દર્શાવે છે કે અમેરિકાના વિકલ્પ તરીકે કેનેડાની ભારે માંગ છે.

આ ઉપરાંત, કેનેડા સરકારે વૈશ્વિક સ્તરેથી ૧,૦૦૦ થી વધુ ટોચના આંતરરાષ્ટ્રીય સંશોધકો અને શિક્ષણવિદોને તેમના પરિવાર સાથે દેશમાં લાવવા માટે બજેટ ૨૦૨૫ માં C$૧.૭ બિલિયન (કેનેડિયન ડોલર) ના ભંડોળનો પ્રસ્તાવ મૂક્યો છે. જોકે, આ યોજના હેઠળ કેનેડા પોતાના એકંદર ઇમિગ્રેશન આંકડામાં વધારો કરવા માંગતું નથી. ૨૦૨૬-૨૦૨૮ ના પ્લાન મુજબ દર વર્ષે કાયમી નિવાસીઓનો લક્ષ્યાંક ૩,૮૦,૦૦૦ રખાયો છે. ઓટાવા સરકારી સેવાઓ અને ગૃહ નિર્માણ પરનું દબાણ ઘટાડવા માટે બિન-જરૂરી કામચલાઉ સ્થાનાંતરણ ઘટાડી રહી છે, પરંતુ પોતાના અર્થતંત્ર માટે અત્યંત મૂલ્યવાન હોય તેવી પસંદગીગીની વૈશ્વિક પ્રતિભાઓને જ આકર્ષવા માંગે છે.

અંકડાશાસ્ત્ર અનુસાર, કેનેડાના ટેકનોલોજી સેક્ટરમાં ૪૦%, ટ્રાન્સપોર્ટેશનમાં ૪૪% અને હેલ્થકેર ક્ષેત્રે એક તૃતીયાંશ કર્મચારીઓ ઇમિગ્રન્ટ્સ છે. આ સંજોગોમાં, જ્યારે વોશિંગ્ટન વિદેશી કામદારો માટે પોતાના દરવાજા ચુસ્ત કરી રહ્યું છે, ત્યારે ઓટાવા પોતાને ઉચ્ચ પ્રતિભાવંત માનવબળ માટે એક સુરક્ષિત અને શ્રેષ્ઠ વિકલ્પ તરીકે રજૂ કરીને વેપાર અને ટેકનોલોજી બંને મોરચે અમેરિકાને સીધો પડકાર આપી રહ્યું છે.