પટના : બિહાર પબ્લિક સર્વિસ કમિશન (BPSC) ની ૭૦મી પરીક્ષામાં કથિત ગેરરીતિઓ, પેપર લીક અને ભરતીમાં વિલંબ જેવા ગંભીર મુદ્દાઓને લઈને આજે પટનાના રસ્તાઓ પર સંગ્રામ જેવી સ્થિતિ સર્જાઈ હતી. બિહારના ગાંધી મેદાનથી રાજભવન અને મુખ્યમંત્રી નિવાસસ્થાનનો ઘેરાવ કરવા નીકળેલા હજારો વિદ્યાર્થીઓ અને પોલીસ વચ્ચે ભારે અથડામણ થઈ હતી. આંદોલનકારી વિદ્યાર્થીઓએ સુરક્ષા માટે લગાવવામાં આવેલા બેરિકેડ્સ તોડી પાડતાં પોલીસે તેમને વિખેરવા માટે વૉટર કૅનનનો ઉપયોગ કરવો પડ્યો હતો અને કેટલાંક પ્રદર્શનકારીઓની અટકાયત પણ કરવામાં આવી હતી.

વિદ્યાર્થીઓનો મુખ્ય આરોપ છે કે ૭૦મી BPSC પ્રારંભિક પરીક્ષામાં મોટો ગોટાળો થયો છે અને પેપર લીકની ઘટનાઓ સામે આવી છે, તેથી આ પરીક્ષા તાત્કાલિક અસરથી રદ કરવામાં આવે. આ ઉપરાંત, આંદોલનકારીઓએ શિક્ષક ભરતી પરીક્ષા (TRE 4.0) ને બે તબક્કામાં યોજવાના પ્રસ્તાવનો વિરોધ કરીને તેને એક જ તબક્કામાં યોજવા તેમજ નેગેટિવ માર્કિંગ દૂર કરવાની માંગ કરી છે. વિદ્યાર્થી નેતાઓના જણાવ્યા મુજબ, બિહાર સ્ટાફ સિલેક્શન કમિશન (BSSC), સબ-ઈન્સ્પેક્ટર અને લાઇબ્રેરિયન ભરતીની પરીક્ષાઓ વર્ષોથી લટકેલી છે, જેના કારણે રાજ્યના લાખો યુવાનોનું ભવિષ્ય અંધકારમય બન્યું છે.

આ વિવાદ વધુ વકરતાં રાજકારણ પણ ગરમાયું છે. બિહાર વિધાનસભાના વિપક્ષી નેતા તેજસ્વી યાદવે ઉપમુખ્યમંત્રી સમ્રાટ ચૌધરીને પત્ર લખીને આંદોલનકારી વિદ્યાર્થીઓ સાથે તાત્કાલિક રચનાત્મક વાટાઘાટો કરવાની માંગ કરી છે. આ ઉપરાંત, તેમણે BPSC માં હિન્દી માધ્યમના ઉમેદવારો સામે થતા કથિત ભેદભાવ અટકાવવા અને ભૂતકાળની તમામ ભરતી પરીક્ષાઓમાં થયેલી ગેરરીતિઓની ઉચ્ચસ્તરીય તપાસની માંગ ઉઠાવી છે.

બીજી તરફ, બિહાર સરકારે પરિસ્થિતિ થાળે પાડવાના પ્રયાસરૂપે જાહેરાત કરી છે કે વિદ્યાર્થીઓની મોટાભાગની વ્યાજબી માંગણીઓનો ઉકેલ લાવવા પગલાં લેવાઈ રહ્યા છે. સરકારે ફરિયાદોના ઝડપી નિવારણ માટે દર મહિનાના ચોથા મંગળવારે 'વિદ્યાર્થી સહયોગ શિબિર' યોજવાની પણ જાહેરાત કરી છે. જોકે, ભૂખ હડતાળ અને આંદોલન પર બેઠેલા વિદ્યાર્થીઓએ સ્પષ્ટ કર્યું છે કે જ્યાં સુધી તેમની તમામ માંગણીઓ અંગે સ્પષ્ટ આદેશ બહાર પાડવામાં નહીં આવે ત્યાં સુધી તેમનો શાંતિપૂર્ણ સંઘર્ષ ચાલુ જ રહેશે.