નવી દિલ્હી, તા.૨૫: ભારત અને ચીન વચ્ચેના સરહદી તણાવ હળવા થવાના સંકેતો વચ્ચે રાજદ્વારી સ્તરે એક અતિ મહત્વના સમાચાર સામે આવ્યા છે. આગામી મહિને ભારતની યજમાનીમાં યોજાનારી બ્રિક્સ (BRICS) શિખર પરિષદમાં ભાગ લેવા માટે ચીનના રાષ્ટ્રપતિ શી જિનપિંગ નવી દિલ્હીની મુલાકાતે આવે તેવી પ્રબળ શક્યતાઓ છે. આ મુલાકાત દરમિયાન તેમની સાથે આશરે ૪૦૦ જેટલા ઉચ્ચ અધિકારીઓનું એક મોટું પ્રતિનિધિમંડળ પણ ભારત આવશે. જો આ પ્રવાસ સંપન્ન થશે, તો વિતેલા સાત વર્ષોમાં શી જિનપિંગની આ પ્રથમ ભારત મુલાકાત બની રહેશે.

પ્રાપ્ત માહિતી અનુસાર, જિનપિંગ ૧૨ અને ૧૩ સપ્ટેમ્બર દરમિયાન નવી દિલ્હી ખાતે હાજરી આપી શકે છે. ખાસ વાત એ છે કે આ વખતે તેમની સાથે આવનારું ડેલિગેશન ૨૦૧૯માં તેમની છેલ્લી ભારત મુલાકાત (મહાબલીપુરમ સમિટ) વખત કરતાં બમણાથી પણ વધુ મોટું હશે. તે સમયે તેમની સાથે ૨૦૦થી ઓછા અધિકારીઓ આવ્યા હતા. હાલમાં ચીની અધિકારીઓની એક ટીમ દિલ્હીની અગ્રણી હોટેલોમાં રોકાણની વ્યવસ્થા અને સુરક્ષા પ્રોટોકોલ અંગે ભારતીય એજન્સીઓ સાથે મળીને આખરી ઓપ આપી રહી છે. જોકે, વડાપ્રધાન નરેન્દ્ર મોદી સાથે તેમની દ્વિપક્ષીય બેઠકની સત્તાવાર કાર્યસૂચિ હજુ નક્કી કરવાની બાકી છે.

ચીનના વિદેશ મંત્રાલયે પણ સ્પષ્ટ કર્યું છે કે બેઇજિંગ બ્રિક્સ સંગઠનના સહયોગને ખૂબ મહત્વ આપે છે અને ચાલુ વર્ષે બ્રિક્સના અધ્યક્ષ તરીકે ભારતને આ સમિટના સફળ આયોજન માટે પૂરેપૂરું સમર્થન આપે છે. ૨૦૨૦માં થયેલી ગલવાન ઘાટીની કમનસીબ અથડામણ બાદ બંને દેશો વચ્ચેના રાજદ્વારી અને સરહદી સંબંધોમાં ભારે ખટાશ આવી ગઈ હતી. પરંતુ ઓક્ટોબર ૨૦૨૪માં સરહદેથી સૈન્ય પાછું ખેંચવાના કરાર બાદ બંને દેશો વચ્ચે ફરી એકવાર ઉચ્ચ સ્તરીય વાટાઘાટોનો દોર શરૂ થયો છે.

આ પ્રસ્તાવિત મુલાકાતના થોડા દિવસો પહેલા જ ભારતના રાષ્ટ્રીય સુરક્ષા સલાહકાર (NSA) અજિત ડોભાલે બેઇજિંગમાં ચીનના ઉપરાષ્ટ્રપતિ હાન ઝેંગ સાથે મહત્વની બેઠક કરી હતી. આ ઉપરાંત, બંને દેશો વચ્ચે સરહદ વિવાદ અંગેના ૨૫મા રાઉન્ડની ખાસ પ્રતિનિધિ સ્તરની વાટાઘાટો પણ ચીનના વિદેશ મંત્રી વાંગ યી સાથે યોજાઈ હતી. ભારત અને ચીન વચ્ચે સરહદે શાંતિ સ્થાપવા અને આર્થિક તથા રાજદ્વારી સંબંધોને પુનઃ પાટા પર લાવવાની આ દિશામાં જિનપિંગનો આ ભારત પ્રવાસ અત્યંત નિર્ણાયક સાબિત થઈ શકે છે.