ટોક્યો:  ટોક્યો ખાતે યોજાયેલી એક ઉચ્ચ સ્તરીય બિઝનેસ બેઠકમાં કેન્દ્રીય વાણિજ્ય અને ઉદ્યોગ મંત્રી પિયુષ ગોયલે વૈશ્વિક રોકાણકારોનું ધ્યાન ખેંચવા માટે ચીન પર આકરો પરાક્ષ પ્રહાર કર્યો હતો. ૨૦૦થી વધુ ભારતીય બિઝનેસ લીડરોના પ્રતિનિધિમંડળનું નેતૃત્વ કરી રહેલા ગોયલે જાપાની કંપનીઓને ભારતમાં રોકાણ કરવા માટે આહ્વાન કર્યું હતું. ચીનનું નામ લીધા વિના તેમણે અલીબાબાના સ્થાપક જેક માના ઉદાહરણ દ્વારા સમજાવ્યું કે કટોકટી અને સરકારી કડક નિયંત્રણોવાળા દેશોના બદલે ભારત જેવા લોકશાહી દેશમાં રોકાણ કરવું કેટલું સુરક્ષિત છે. તેમણે સ્પષ્ટ શબ્દોમાં કહ્યું કે, "ભારતમાં તમે સફળ બિઝનેસમેન બનીને અચાનક ગાયબ થઈ જશો અને પછી જાપાનની કોઈ યુનિવર્સિટીમાં પ્રોફેસર તરીકે ફરી દેખાશો—તેવું જોખમ અહીં બિલકુલ નથી."

ઉલ્લેખનીય છે કે વર્ષ ૨૦૨૦માં ચીન સરકારની આર્થિક નીતિઓની ટીકા કર્યા પછી અબજોપતિ ઉદ્યોગપતિ જેક મા મહિનાઓ સુધી ગાયબ થઈ ગયા હતા. ચીની સરકારે તેમના એન્ટ ગ્રુપનો વિશાળ IPO રદ કર્યો અને અલીબાબા પર $૨.૮ બિલિયનનો દંડ ફટકાર્યો હતો. આ કડક કાર્યવાહી બાદ જેક માએ પોતાના બિઝનેસ સામ્રાજ્યમાંથી પીછેહઠ કરવી પડી અને તેઓ લાંબા સમય સુધી લોકોની નજરથી દૂર રહ્યા પછી ટોક્યો યુનિવર્સિટીમાં પ્રોફેસર તરીકે જાહેરમાં આવ્યા હતા. પિયુષ ગોયલે આ ઘટનાનો સંદર્ભ આપીને ચીન સામેની બિઝનેસ અસુરક્ષા તરફ આંગળી ચીંધી અને ભારતમાં ઉદ્યોગસાહસિકતાને પ્રોત્સાહન અને પૂર્ણ સલામતી મળતી હોવાનો વિશ્વાસ આપ્યો હતો.

આ સાથે જ, ગોયલે જાપાની કંપનીઓને સેમિકન્ડક્ટર, આર્ટિફિશિયલ ઇન્ટેલિજન્સ (AI), ક્લીન એનર્જી અને અદ્યતન ઉત્પાદન ક્ષેત્રોમાં રોકાણ વધારવા વિનંતી કરી હતી. તેમણે ખાતરી આપી કે ભારતમાં બૌદ્ધિક સંપત્તિ (IPR)નું સન્માન થાય છે અને કોઈનો ડેટા ચોરી થશે નહીં. ચીન પરથી પોતાની નિર્ભરતા ઘટાડવા મથતી વૈશ્વિક કંપનીઓ માટે ભારત કોઈ માત્ર 'ચીન પ્લસ વન' વિકલ્પ નથી, પરંતુ તે પોતાનામાં જ એક મજબૂત અને સ્વતંત્ર આર્થિક સ્થળ છે તે બાબત પર મંત્રીએ ભાર મૂક્યો હતો. ૨૦૦૦થી ૨૦૨૬ સુધીમાં જાપાન તરફથી ભારતને $૪૮.૧૪ બિલિયનનું FDI મળ્યું છે અને નવી દિલ્હી હવે આ ભાગીદારીને નવી ઊંચાઈઓ પર લઈ જવા માટે સજ્જ છે.