પણજી: આમ આદમી પાર્ટીના રાષ્ટ્રીય સંયોજક અરવિંદ કેજરીવાલે ગોવામાં આયોજિત બીજા ટાઉન હોલ કાર્યક્રમ દરમિયાન ભારતીય જનતા પાર્ટી પર આકરા પ્રહારો કરતા એક ખૂબ જ મોટો રાજકીય દાવ ખેલ્યો છે. કેજરીવાલે ૨૦૨૭ની ગોવા વિધાનસભા ચૂંટણીને લક્ષ્યમાં રાખીને મોટી ગેરંટી આપતા જણાવ્યું હતું કે જો ભાજપ હારે છે અને ગોવામાં 'આપ'ની સરકાર બને છે, તો ૧૦ માર્ચે ચૂંટણી પરિણામો આવ્યાના ગણતરીના પાંચ જ દિવસમાં એટલે કે ૧૫ માર્ચ સુધીમાં સમગ્ર રાજ્યમાં E20 (ઇથેનોલ મિશ્રિત) પેટ્રોલના વેચાણ પર સંપૂર્ણ પ્રતિબંધ મૂકવામાં આવશે. એટલું જ નહીં, પોતાની આ ગેરંટી પર ભાર મુકતા તેમણે કહ્યું હતું કે જો ચૂંટણી પરિણામોના પાંચ દિવસમાં E20 રદ ન થાય, તો તેઓ રાજકારણ જ છોડી દેશે.

કેજરીવાલે દેશભરમાં ચર્ચાનો વિષય બનેલા E20 બળતણનો મુદ્દો ઉઠાવતા આરોપ લગાવ્યો હતો કે આ ઇથેનોલ મિશ્રિત પેટ્રોલ વાહનોના એન્જિનને ગંભીર નુકસાન પહોંચાડી રહ્યું છે અને તેની ઇંધણ કાર્યક્ષમતા તેમજ માઇલેજમાં નોંધપાત્ર ઘટાડો કરી રહ્યું છે. ગોવાની જનતાની સ્થિતિ રજૂ કરતા તેમણે દાવો કર્યો હતો કે રાજ્યના લગભગ ૮૭% લોકો E20 પેટ્રોલની સમસ્યાથી ભારે પરેશાન છે. તેમણે ઉમેર્યું હતું કે તેમને મળેલા હજારો વોટ્સએપ મેસેજ અને પ્રતિભાવો દર્શાવે છે કે સામાન્ય જનતા પોતાના કિંમતી વાહનોના એન્જિન બગડવાથી ગુસ્સામાં છે. આ ઉપરાંત, તેમણે એવો પણ ગંભીર આરોપ લગાવ્યો હતો કે ઇથેનોલ ઉત્પાદન માટે આશરે ૨૫ લાખ ટન શેરડી ડાયવર્ટ કરવામાં આવતાં દેશમાં ખાંડના ભાવ વધી રહ્યા છે.

જોકે, કેન્દ્ર સરકારે વિપક્ષના આ તમામ દાવાઓને સરેરાશ ફગાવી દીધા છે અને સ્પષ્ટતા કરી છે કે દેશમાં સ્થાનિક જરૂરિયાતોને પહોંચી વળવા માટે ખાંડનો પૂરતો સ્ટોક ઉપલબ્ધ છે. બીજી તરફ કેજરીવાલે ભાજપના અહંકાર પર નિશાન સાધતા કહ્યું હતું કે સત્તાધારી પક્ષ એવું વિચારે છે કે જનતા ક્યાંય જવાની નથી. તેમણે વૈશ્વિક ટ્રેન્ડ અને સપ્લાય ચેઇનની વાતો વચ્ચે ગોવાને 'ચીન પ્લસ વન' જેવા માત્ર એક વિકલ્પ તરીકે નહીં પરંતુ એક સશક્ત અને મહત્વપૂર્ણ રાજકીય-આર્થિક કેન્દ્ર તરીકે જોવાની હાકલ કરી હતી. ૨૦૨૭ની ચૂંટણીના પરિણામો પછી સરકાર રચાય તેના પાંચ દિવસમાં ઇથેનોલ બેન કરવાની આ જાહેરાતે ગોવાના રાજકારણમાં અને વાહનચાલકોમાં ભારે ગરમાવો લાવી દીધો છે.