નવી દિલ્હી:  પશ્ચિમ બંગાળમાં 'વિશેષ ગહન સુધારણા' (SIR) ની પ્રક્રિયા પૂર્ણ થયા બાદ મતદાર યાદીમાંથી નામો બાકાત રાખવા અને ઉમેરવા સામે થયેલી અપીલો અંગે સુપ્રીમ કોર્ટે કડક વલણ અપનાવ્યું છે. સર્વોચ્ચ અદાલતે ભારતીય ચૂંટણી પંચ ને આદેશ આપ્યો છે કે ટ્રિબ્યુનલ સમક્ષ પેન્ડિંગ અને ઉકેલાયેલી અપીલોનો સંપૂર્ણ ડેટા રજૂ કરવામાં આવે. કોર્ટે સ્પષ્ટ કહ્યું છે કે નાગરિકોના મતાધિકાર સાથે જોડાયેલા આ મુદ્દાનો નિકાલ ચોક્કસ સમયમર્યાદામાં થવો જરૂરી છે.

સુનાવણી દરમિયાન વરિષ્ઠ વકીલોએ દલીલ કરી હતી કે આગામી સ્થાનિક અને મ્યુનિસિપલ ચૂંટણીઓને ધ્યાનમાં રાખીને, જેમના નામ યાદીમાંથી હટાવાયા છે તેઓ મતદાન પ્રક્રિયાથી વંચિત રહી શકે છે. જાહેર ક્ષેત્રમાં અપીલોનો સ્પષ્ટ ડેટા ઉપલબ્ધ ન હોવા અંગે ચિંતા વ્યક્ત કરવામાં આવી હતી. આ મુદ્દે સુપ્રીમ કોર્ટે સ્પષ્ટતા કરી કે તે માત્ર અમુક ચોક્કસ મતવિસ્તારો પૂરતી પોતાની સુનાવણી મર્યાદિત નહીં રાખે પરંતુ સમગ્ર રાજ્યના તમામ મતવિસ્તારોની સ્થિતિ ધ્યાને લેશે અને જરૂર પડે તો વધુ અપીલ ટ્રિબ્યુનલ પણ રચવામાં આવશે.

બીજી તરફ ચૂંટણી પંચ વતી રજૂઆત કરવામાં આવી હતી કે અપીલ પ્રક્રિયાને ઝડપી અને વધુ સુવ્યવસ્થિત કરવા માટે ટ્રિબ્યુનલ સાથે સંકલન સાધવામાં આવી રહ્યું છે. સુપ્રીમ કોર્ટના નિર્દેશો બાદ કોલકાતા હાઈકોર્ટના પૂર્વ મુખ્ય ન્યાયાધીશો અને ન્યાયાધીશોના નેતૃત્વમાં રચાયેલી ખાસ ટ્રિબ્યુનલો દ્વારા આ અપીલોનો નિર્ણય લેવાઈ રહ્યો છે.