બેઇજિંગ : ભારત અને ચીન વચ્ચેના દ્વિપક્ષીય સંબંધોમાં સુધારા તરફ એક અત્યંત મહત્વપૂર્ણ પગલું ભરાયું છે. બેઇજિંગ ખાતે ચીનના વિદેશ મંત્રી વાંગ યી સાથેની ઉચ્ચ સ્તરીય વાટાઘાટો દરમિયાન ભારતના રાષ્ટ્રીય સુરક્ષા સલાહકાર (NSA) અજિત ડોભાલે મંગળવારે સ્પષ્ટ કર્યું હતું કે વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગના માર્ગદર્શન હેઠળ બંને દેશોના સંબંધો હવે "સતત સામાન્યતા તરફ પાછા ફરી રહ્યા છે."

સરહદ પ્રશ્ન પર ખાસ પ્રતિનિધિઓ વચ્ચે યોજાયેલી ૨૫મા રાઉન્ડની આ વાટાઘાટોમાં બંને પક્ષો વચ્ચે કલાકો સુધી સઘન ચર્ચા ચાલી હતી. આ બેઠક અગાઉ NSA અજિત ડોભાલે ચીનના ઉપરાષ્ટ્રપતિ હાન ઝેંગ સાથે પણ અગત્યની મુલાકાત કરી હતી. ચર્ચા દરમિયાન અજિત ડોભાલે જણાવ્યું હતું કે કાઝાન અને તિયાનજિનમાં બંને નેતાઓ વચ્ચે યોજાયેલી બેઠકોએ દ્વિપક્ષીય સંબંધોને એક સ્પષ્ટ અને આશાસ્પદ દિશા આપી છે. તેમણે ઉમેર્યું કે સરહદી વિસ્તારોમાં શાંતિ અને સુલેહ જાળવવાના સતત પ્રયાસોનું જ પરિણામ છે કે બંને દેશો વચ્ચે હવે સ્થિતિ સુધરી રહી છે.

આ પ્રસંગે ચીનના વિદેશ મંત્રી વાંગ યી પણ ભારત સાથેના સંબંધો અંગે સકારાત્મક વલણ દર્શાવ્યું હતું. તેમણે જણાવ્યું કે ભારત અને ચીન વચ્ચેના સંબંધો માત્ર દ્વિપક્ષીય મર્યાદા પૂરતા સીમિત નથી પરંતુ વૈશ્વિક અને વ્યૂહાત્મક મહત્વ ધરાવે છે. બંને દેશોએ એકબીજાના સફળ ભાગીદાર બનીને મતભેદો અને અવરોધોને દૂર કરવા તરફ કામ કરવું પડશે.

આગામી ૧૨ સપ્ટેમ્બરના રોજ નવી દિલ્હી ખાતે યોજાનારી બ્રિક્સ (BRICS) સમિટમાં ચીનના રાષ્ટ્રપતિ શી જિનપિંગ હાજરી આપે તેવી શક્યતાઓ છે, જે સાત વર્ષમાં તેમની પ્રથમ ભારત મુલાકાત હશે. આ પરિપ્રેક્ષ્યમાં બેઇજિંગમાં યોજાયેલી આ વાટાઘાટો આગામી સમયમાં ભારત-ચીન સરહદ સુરક્ષા અને આર્થિક સહયોગ માટે અત્યંત નિર્ણાયક માનવામાં આવી રહી છે.