નવી દિલ્હી : યુનિયન પબ્લિક સર્વિસ કમિશન (UPSC) ની સિવિલ સર્વિસીસ પરીક્ષા (CSE) ૨૦૨૫ ના ૯૫૮ સફળ ઉમેદવારોની સેવા ફાળવણી અને ભવિષ્યની અન્ય સરકારી ભરતીઓને લઈને દેશમાં એક નવું કાનૂની અને રાજકીય વાવાઝોડું સરજાયું છે. અનામતમાં OBC ક્રીમી-લેયર નક્કી કરવા અંગે સુપ્રીમ કોર્ટે ૧૧ માર્ચે આપેલા ચુકાદા અંગે કેન્દ્ર સરકારે સ્પષ્ટતાની અરજી દાખલ કરી છે. આ ગંભીર બાબતની સુનાવણી માટે મંગળવારે સુપ્રીમ કોર્ટે એક વિશેષ બેન્ચ રચવા અંગે વિચારણા કરવા સંમતિ દર્શાવી છે.

કાર્મિક અને તાલીમ વિભાગ (DoPT) દ્વારા સુપ્રીમ કોર્ટ સમક્ષ રજૂઆત કરવામાં આવી છે કે ૧૧ માર્ચના ચુકાદાને પૂર્વવર્તી (પાછલી અસરથી) અમલમાં મૂકવો "અત્યંત મુશ્કેલ" છે. જો આ નિર્ણય જૂની ભરતીઓ પર લાગુ કરવામાં આવશે તો ૨૦૧૨ અને ૨૦૧૬ પછી કેન્દ્ર સરકારના વિવિધ મંત્રાલયો, બેંકો, રેલ્વે અને અર્ધલશ્કરી દળોમાં થયેલી ૩.૭ લાખથી વધુ OBC ભરતીઓ તેમજ ૧૮ રાજ્યોની પસંદગી પ્રક્રિયાઓ પર તેની અત્યંત વિપરીત અને "કેસ્કેડિંગ અસર" પડશે. આનાથી વરિષ્ઠતાનું માળખું ખોરવાઈ જશે અને અધિકારીઓમાં ભારે અસંતોષ ઊભો થશે.

સુપ્રીમ કોર્ટે પોતાના ૧૧ માર્ચના રોહિત નાથન ચુકાદામાં આદેશ આપ્યો હતો કે જે ઉમેદવારોના માતાપિતા જાહેર ક્ષેત્રના સાહસો (PSU) અથવા ખાનગી ક્ષેત્રમાં કામ કરે છે, તેમના પગારના ઘટકને આવક પરીક્ષણમાંથી બાકાત રાખવો જોઈએ જેથી સરકારી ક્ષેત્રમાં કામ કરતા કર્મચારીઓના બાળકો સાથે કોઈ ભેદભાવ ન થાય. કોર્ટે અગાઉ બાકાત રહી ગયેલા ઉમેદવારો માટે 'સુપરન્યુમરરી પોસ્ટ્સ' (ઉપરી હોદ્દાઓ) ઊભી કરવા પણ સૂચના આપી હતી.

જોકે, કેન્દ્ર સરકારે કોર્ટમાં મજબૂત દલીલ કરી છે કે આ નિર્ણયના કારણે રૂ. ૧ કરોડથી વધુ વાર્ષિક આવક ધરાવતા આર્થિક રીતે સક્ષમ માતાપિતાના સંતાનો પણ 'નોન-ક્રીમી લેયર'નો લાભ મેળવી લેશે, જે વાસ્તવિક સંસાધન-વિહોણા અને ગરીબ OBC ઉમેદવારો સાથે મોટો અન્યાય થશે. હાલમાં જંતર-મંતર ખાતે પણ વિવિધ જૂથો અનામત પ્રણાલીના આ નિયમો અંગે વિરોધ નોંધાવી રહ્યા છે.

DoPT એ સુપ્રીમ કોર્ટને આગ્રહ કર્યો છે કે CSE-૨૦૨૫ અને CSE-૨૦૨૬ બેચ માટે ઉમેદવારોની ફાળવણી જૂના ક્રીમી-લેયર નિયમો મુજબ જ આગળ વધારવા માટે મંજૂરી આપવામાં આવે, જેથી સિવિલ સર્વન્ટ્સનો ફાઉન્ડેશન કોર્સ સમયસર શરૂ થઈ શકે. આ સંવેદનશીલ મુદ્દે હવે સુપ્રીમ કોર્ટની વિશેષ બેન્ચ આગામી દિવસોમાં આખરી આદેશ જાહેર કરશે.