ટોક્યો : જાપાનના આઓમોરી પ્રીફેક્ચરમાં આવેલો અને વર્ષ ૧૬૧૧માં બનેલો અતિ પ્રખ્યાત ઐતિહાસિક 'હિરોસાકી કિલ્લો' હાલમાં એક અભૂતપૂર્વ અને રોમાંચક ઘટનાને કારણે સમગ્ર વિશ્વમાં ચર્ચાનું કેન્દ્ર બન્યો છે. ઉત્તર જાપાનમાં વિક્રેન્દ્રીકૃત કિલ્લા પુનઃસ્થાપન પ્રોજેક્ટ અંતર્ગત ૩૬૦ ટન વજન ધરાવતા આ વિશાળ કિલ્લેબંધી ટાવરને તેના મૂળ સ્થાને પાછો ખસેડવા માટે લગભગ ૧,૮૦૦ જેટલા લોકોએ એકઠા થઈને શક્તિ પ્રદર્શન કર્યું હતું. હાથમાં દોરડા પકડીને નાગરિકોએ આખી ઈમારતને બે મીટરથી વધુ અંતર સુધી ખેંચી કાઢી હતી.

કિલ્લાને સુરક્ષિત અને અકબંધ રાખવા માટે જાપાનની અતિ પ્રાચીન સ્થાપત્ય તકનીક 'હિકિયા' (Hikiya) નો ઉપયોગ કરવામાં આવ્યો છે. આ પદ્ધતિમાં ઈમારતને તોડી પાડવાને બદલે તેની નીચે ખાસ રેલ અને રોલર્સ મૂકીને આખું માળખું સરકાવવામાં આવે છે. આ કિલ્લો ભૂકંપમાં ક્ષતિગ્રસ્ત થયેલી પથ્થરની દીવાલોના સમારકામ માટે ૨૦૧૫માં ખસેડવામાં આવ્યો હતો. હવે ૨,૧૮૫ પથ્થરોનું સમારકામ પૂર્ણ થતાં તેને મૂળ સ્થાન પર લાવવામાં આવી રહ્યો છે. ૮૦-૮૦ લોકોની ટીમોએ ૩૦ મીટર લાંબા દોરડાથી વારાફરતી ખેંચીને શનિવારે ૧.૧૩ મીટર અને રવિવારે ૧.૦૯ મીટર સુધી કિલ્લો ખસેડ્યો હતો.

આ ઐતિહાસિક કવાયત માટે જાપાન સરકારને ૧,૮૦૦ સ્લોટ સામે દેશ-વિદેશમાંથી ૮,૦૦૦થી વધુ અરજીઓ મળી હતી. માત્ર જાપાન જ નહીં પરંતુ યુરોપ, ઉત્તર અમેરિકા અને દક્ષિણ-પૂર્વ એશિયાથી લોકો આ કાર્યનો ભાગ બનવા પહોંચ્યા હતા. ઓગસ્ટના અંત સુધીમાં કુલ ૪,૧૦૦ નાગરિકો દ્વારા કિલ્લાને ૫ મીટર સુધી માનવશક્તિથી ખેંચવામાં આવશે, અને ત્યારબાદ બાકીનું ૭૩ મીટરનું અંતર આધુનિક મશીનરી દ્વારા કાપવામાં આવશે.

ઉલ્લેખનીય છે કે હિરોસાકી કિલ્લો જાપાનમાં બચેલા ૧૨ મૂળ કિલ્લાઓમાંથી એક છે અને રાષ્ટ્રીય સાંસ્કૃતિક સંપત્તિ છે. ચેરી બ્લોસમ સીઝનમાં દર વર્ષે ૨૦ લાખથી વધુ પ્રવાસીઓને આકર્ષતો આ કિલ્લો સંપૂર્ણ જાળવણી કાર્ય બાદ ૨૦૩૩માં ફરીથી મુલાકાતીઓ માટે જાહેર કરવામાં આવશે.