મોસ્કો : રશિયા અને યુક્રેન વચ્ચે ચાલી રહેલા ભયાનક યુદ્ધના અત્યંત નિર્ણાયક તબક્કે એક એવી ચોંકાવનારી ઘટના સામે આવી છે જેને વૈશ્વિક રાજકારણ અને લશ્કરી ક્ષેત્રે ભારે ખળભળાટ મચાવી દીધો છે. અમેરિકી વાયુસેનાનું વિશાળકાય યુદ્ધ વિમાન C-17A ગ્લોબમાસ્ટર III અચાનક રશિયાની રાજધાની મોસ્કોમાં લેન્ડ થતાં સમગ્ર વિશ્વની નજરો તેના પર ટકેલી છે. ફ્લાઇટ ટ્રેકિંગ ડેટા અનુસાર, કૉલસાઇન નંબર RCS4555 ધરાવતું આ યુએસ મિલિટરી વિમાન મંગળવારે સવારે રીગાથી રવાના થઈને મોસ્કોના નોવોકુઝનેત્સ્ક એરપોર્ટ પર ઉતર્યું હતું.

સૌથી વધુ આશ્ચર્યજનક બાબત એ છે કે આ વિમાન ૨૩ ઓગસ્ટના રોજ મેરીલેન્ડના કેમ્પ સ્પ્રિંગ્સ (જોઇન્ટ બેઝ એન્ડ્રુઝ) થી નીકળ્યું હતું, જ્યાં અમેરિકી રાષ્ટ્રપતિ અને વરિષ્ઠ લશ્કરી અધિકારીઓના ખાસ વિમાનો તૈનાત હોય છે. આટલી મહત્ત્વપૂર્ણ ફ્લાઇટ અંગે ક્રેમલિનના પ્રવક્તા દિમિત્રી પેસ્કોવે સ્પષ્ટતા કરી છે કે મોસ્કો પાસે અમેરિકી લશ્કરી વિમાનના આગમન અંગે કોઈ સત્તાવાર માહિતી નથી. વળી, રશિયન રાજ્ય મીડિયાના જણાવ્યા મુજબ, આ અઠવાડિયે રશિયા અને યુએસ વહીવટી અધિકારીઓ વચ્ચે કોઈ ઉચ્ચ સ્તરીય બેઠક પણ પ્રસ્તાવિત નહોતી.

આ રહસ્યમય ઘટના એવા સમયે બની છે જ્યારે રશિયા અને યુક્રેન વચ્ચે મિસાઈલ યુદ્ધ ચરમસીમાએ છે. તાજેતરમાં જ રશિયા દ્વારા યુક્રેનની રાજધાની કિવ પર કરવામાં આવેલા ભયાનક રાત્રિ મિસાઈલ હુમલામાં ૧૫ લોકોના મોત થયા હતા, જેના કારણે કિવમાં શોકનો માહોલ છે. યુક્રેનના રાષ્ટ્રપતિ વોલોડીમીર ઝેલેન્સકીએ સ્વીકાર્યું છે કે યુક્રેન હાલમાં એર ડિફેન્સ મિસાઇલોની ભારે અછતનો સામનો કરી રહ્યું છે. અમેરિકા પાસેથી મળતી પેટ્રિઅટ ઇન્ટરસેપ્ટર મિસાઇલોનો જથ્થો ઓછો થતાં રશિયન બેલિસ્ટિક મિસાઇલોને રોકવી મુશ્કેલ બની રહી છે.

યુક્રેનની કટોકટી અને સંરક્ષણ પ્રણાલીની અછત વચ્ચે મોસ્કોના રનવે પર અમેરિકી યુદ્ધ વિમાનનું આ રીતે લેન્ડ થવું એ સામાન્ય રાજદ્વારી ઘટના છે કે પડદા પાછળ કોઈ મોટી ગુપ્ત વ્યૂહરચના આકાર લઈ રહી છે, તે પ્રશ્ન અત્યારે વૈશ્વિક સુરક્ષા એજન્સીઓ માટે ચર્ચાનો મોટો વિષય બન્યો છે.