શ્રીનગર : જમ્મુ અને કાશ્મીરમાં આતંકવાદ સામે સુરક્ષા દળોએ પોતાની પકડ વધુ મજબૂત બનાવી છે. કાશ્મીર ખીણના શોપિયા અને પુલવામા જિલ્લામાં હાથ ધરવામાં આવેલા ત્રણ અલગ-અલગ સંયુક્ત અભિયાનોમાં સુરક્ષા દળોએ આતંકવાદીઓના ૮ શંકાસ્પદ ઓવરગ્રાઉન્ડ વર્કર્સ (OGWs) ની ધરપકડ કરી છે. આ ધરપકડો સાથે જ સુરક્ષા એજન્સીઓએ શંકાસ્પદ આતંકી નેટવર્ક દ્વારા કોઈ મોટો સુરક્ષા ખતરો ઊભો થાય તે પહેલાં જ તેના પર પાણી ફેરવી દીધું છે. આ દરોડા દરમિયાન સૈન્યને મોટી માત્રામાં પિસ્તોલ, જીવંત કારતૂસ, હેન્ડ ગ્રેનેડ અને દેશવિરોધી સામગ્રી મળી આવી છે.

પ્રથમ કામગીરીમાં, ચોક્કસ ગુપ્ત માહિતીના આધારે પોલીસ અને સેનાએ શોપિયા જિલ્લાના ઈમામસાહેબ સ્થિત એક સફરજનના બગીચામાં સંયુક્ત દરોડો પાડ્યો હતો. આ સર્ચ ઓપરેશન દરમિયાન સુરક્ષા દળોને નઝીર અહમદ વાની નામના વ્યક્તિના બગીચામાંથી એક ગ્રેનેડ, બે એકે-૪૭ મેગેઝીન, ચાર મોબાઈલ ફોન અને પ્રતિબંધિત આતંકી સંગઠનના પોસ્ટરો મળી આવ્યા હતા. અહીંથી આશિક હુસૈન કુમાર, આરિફ કુમાર અને હેરિસ મંજૂર નામના ત્રણ શંકાસ્પદ આતંકી મદદગારોને ઝડપી લેવામાં આવ્યા હતા. ત્યારબાદ શોપિયામાંથી જ મોટરસાયકલ પર સવાર અન્ય ત્રણ શંકાસ્પદો જુનૈદ અહમદ ડાર, અમીર યુસુફ અને જુનૈદ મુઝફ્ફરને બે હેન્ડ ગ્રેનેડ અને હિઝબુલ મુજાહિદ્દીન સાથે જોડાયેલી ગુનાહિત સામગ્રી સાથે કસ્ટડીમાં લેવામાં આવ્યા હતા.

બીજી તરફ, પુલવામા જિલ્લાના રાજપોરા વિસ્તારમાં આવેલા સીબી નાથના યારવાન જંગલમાંથી બે આતંકી સહયોગીઓની ધરપકડ કરવામાં આવી હતી. જંગલમાંથી સીબી નાથ ગામ તરફ શંકાસ્પદ રીતે વધી રહેલા બે શખ્સો - લતીફ અહમદ દીદાદ અને એજાઝ અહમદ બજાદને સતર્ક ટીમોએ ઘેરાબંધી કરીને પકડી પાડ્યા હતા. તેમની પાસેથી એક પિસ્તોલ, ૧૨ જીવંત રાઉન્ડ કારતૂસ અને એક હેન્ડ ગ્રેનેડ જપ્ત કરવામાં આવ્યો છે.

સુરક્ષા દળોએ આ મામલે આર્મ્સ એક્ટ અને ગેરકાયદેસર પ્રવૃત્તિઓ નિવારણ અધિનિયમ (UAPA) ની વિવિધ કલમો હેઠળ ગુનો નોંધીને વધુ તપાસ હાથ ધરી છે. તપાસકર્તાઓ હવે આ શંકાસ્પદોની ગતિવિધિઓ, જપ્ત કરાયેલા શસ્ત્રોના મૂળ સ્રોત અને ઓવરગ્રાઉન્ડ નેટવર્કના અન્ય તાર મેળવવા માટે ઊંડાણપૂર્વક પૂછપરછ કરી રહ્યા છે. ટૂંકા ગાળામાં પાર પાડવામાં આવેલા આ સફળ ઓપરેશને ઘાટીમાં આતંકવાદીઓના મનસૂબા પર પાણી ફેરવી દીધું છે.