નવી દિલ્હી : ભારત આર્ટિફિશિયલ ઈન્ટેલિજન્સ (AI) અને અન્ય મુખ્ય ઊભરતાં ક્ષેત્રોમાં વૈશ્વિક પ્રભુત્વ મેળવીને તેમજ દેશના વિશાળ યુવા વર્ગની ક્ષમતાઓનો યોગ્ય ઉપયોગ કરીને વર્ષ ૨૦૪૭ સુધીમાં ૫૫ ટ્રિલ્યન ડોલરની મહાકાય અર્થવ્યવસ્થા બની શકે છે. ભૂતપૂર્વ મુખ્ય આર્થિક સલાહકાર (CEA) અને હાલમાં ઈન્ટરનેશનલ મોનેટરી ફંડ (IMF) ના ભારત અને દક્ષિણ એશિયા માટેના એક્ઝિક્યુટીવ ડિરેક્ટર ક્રિષ્ણામૂર્તિ સુબ્રમણ્યને ‘ઈન્ડિયા ૨૦૪૭ લીડર્સ ટૉક’ને સંબોધિત કરતા આ મહત્વપૂર્ણ આશાવાદ વ્યક્ત કર્યો હતો.

તેમણે ભારપૂર્વક જણાવ્યું હતું કે જો દેશ સતત ૮ ટકાનો વાસ્તવિક (Real) જીડીપી વૃદ્ધિદર જાળવી રાખે અને વ્યૂહાત્મક મૂડી રોકાણ સાથે મુક્ત માળખાકીય નીતિઓ અપનાવે, તો વર્ષ ૨૦૪૭ સુધીમાં ‘વિકસિત ભારત’નો ૫૫ ટ્રિલ્યન ડોલરનો અતિ મહત્વાકાંક્ષી લક્ષ્યાંક સંપૂર્ણપણે વાસ્તવિકતામાં પરિણમી શકે છે. આ માટે તેમણે ઉચ્ચ ગુણવત્તાવાળા પ્રત્યક્ષ વિદેશી રોકાણ (FDI) ને આકર્ષવા, વૈશ્વિક કક્ષાના ઈલેક્ટ્રોનિક્સ અને ઔદ્યોગિક ઉત્પાદન ક્ષેત્રનો વિસ્તાર કરવા અને AI માં નિપુણ અતિ કુશળ યુવા પ્રતિભાઓનો સમૂહ તૈયાર કરવા પર ખાસ ભાર મૂક્યો હતો.

સુબ્રમણ્યને વધુમાં ઉમેર્યું હતું કે, ભારત માત્ર પોતાના આર્થિક કદનું વિસ્તરણ જ નથી કરી રહ્યું પરંતુ ઉત્પાદન ક્ષેત્રે ઉચ્ચ મૂલ્યવર્ધિત (High Value-Added) ઉત્પાદનો, અવકાશ (Space) અને રાષ્ટ્રીય સંરક્ષણ ક્ષેત્રે હરણફાળ ભરીને આધુનિક જગત માટે એક સ્થિતિસ્થાપક અને મજબૂત આર્થિક મોડેલ પૂરું પાડી રહ્યું છે.

ઉલ્લેખનીય છે કે, IMF ના એપ્રિલ ૨૦૨૬ ના વર્લ્ડ ઈકોનોમિક આઉટલૂક અહેવાલ મુજબ વર્ષ ૨૦૨૫-૨૬ માટે ભારતનો જીડીપી ૩.૯૨ ટ્રિલ્યન ડોલર નોંધાયો હતો અને તે વિશ્વનું છઠ્ઠા ક્રમાંકનું સૌથી મોટું અર્થતંત્ર છે. હાલમાં વૈશ્વિક સ્તરે વેપારી તણાવ અને ભૂરાજકીય વિવાદો હોવા છતાં, મજબૂત સ્થાનિક માગ, ઉત્પાદન અને સર્વિસ સેક્ટરની જોરદાર પ્રવૃત્તિઓને લીધે રિઝર્વ બેન્ક ઓફ ઈન્ડિયા (RBI) એ વર્તમાન નાણાકીય વર્ષ માટે ૬.૭ ટકાના વૃદ્ધિદરનો અંદાજ મૂક્યો છે.