નવી દિલ્હી, તા.26: કેન્દ્રીય મંત્રી કિરેન રિજિજુએ બુધવારે કોંગ્રેસના ભૂતપૂર્વ અધ્યક્ષ રાહુલ ગાંધી અને પક્ષના પ્રવક્તા પવન ખેડા પર એક સનસનાટીભર્યો વિસ્ફોટ કર્યો છે. રિજિજુએ ગંભીર આરોપ લગાવતા દાવો કર્યો છે કે આસામ વિધાનસભા ચૂંટણીના અંતિમ તબક્કા દરમિયાન રાહુલ ગાંધીએ પોતે પવન ખેડાને આસામના મુખ્યમંત્રી હિમંત બિસ્વા શર્મા અને તેમની પત્ની રિંકી ભૂયાન શર્મા સામે "પાયાવિહોણા અને ખોટા આરોપો" લગાવવા માટે આદેશ આપ્યો હતો.

સોશિયલ મીડિયા પ્લેટફોર્મ X પર આ સ્ફોટક દાવો કરતા કિરેન રિજિજુએ લખ્યું કે, કોંગ્રેસના જ બે અતિ વરિષ્ઠ નેતાઓએ તેમને આ કથિત ષડયંત્ર અંગે માહિતી આપી હતી. રિજિજુએ વધુમાં ઉમેર્યું કે આસામમાં આ ખોટા આરોપોની કોઈ અસર ન થઈ અને દાવ ઊંધો પડ્યો, તેમ છતાં આ કામગીરી બદલ પવન ખેડાને બાદમાં "ઇનામ સ્વરૂપે" રાજ્યસભાની સીટ આપવામાં આવી હતી.

નદીમાં નહાવાના વિડીયોથી શરૂ થયેલો વિવાદ પહોંચ્યો પરાકાષ્ઠાએ:

• સોશિયલ મીડિયા પર કટાક્ષ: આ વિવાદની શરૂઆત ત્યારે થઈ જ્યારે કિરેન રિજિજુએ અરુણાચલ પ્રદેશની એક નદીમાં નહાતો પોતાનો વિડીયો શેર કર્યો હતો.

• પવન ખેડાનો તીખો પ્રહાર: આ વિડીયો પર કટાક્ષ કરતા કોંગ્રેસ નેતા પવન ખેડાએ કહ્યું હતું કે ભાજપના નેતાઓના મગજમાં રાહુલ ગાંધીનું નામ એટલું ઘર કરી ગયું છે કે રિજિજુ રાહુલ ગાંધીનું નામ લીધા વગર નદીમાં તરી પણ શકતા નથી.

• રિજિજુનો પલટવાર: પવન ખેડાની આ ટિપ્પણીને અત્યંત અભદ્ર ગણાવતા રિજિજુએ તેમના રાજકીય અનુભવ અને પરિપક્વતા સામે સવાલો ઉઠાવ્યા હતા.

આ શબ્દયુદ્ધમાં કેન્દ્રીય મંત્રીએ આસામના મુખ્યમંત્રી હિમંત બિસ્વા શર્મા સાથેના પવન ખેડાના અગાઉના વિવાદોનો પણ ઉલ્લેખ કર્યો હતો અને કહ્યું હતું કે તેઓ પવન ખેડાની આ કથિત અનુશાસનહીનતાનો મુદ્દો આસામના સીએમ સામે પણ ઉઠાવશે. આક્ષેપ-પ્રતિઆક્ષેપોના આ ખેલથી રાજકીય ગરમાવો ચરમસીમાએ પહોંચ્યો છે.