નવી દિલ્હી : ઈટાલીના ઐતિહાસિક શહેર વેનિસમાં યોજાયેલા ૬૧મા આંતરરાષ્ટ્રીય કલા પ્રદર્શન 'લા બિએનાલે દી વેનેઝિયા ૨૦૨૬'માં ભારતીય કલા અને સંસ્કૃતિનો પ્રભાવશાળી દબદબો જોવા મળી રહ્યો છે. આ વૈશ્વિક પ્રદર્શનમાં યુનાઇટેડ કિંગડમના ભૂતપૂર્વ વડાપ્રધાન ઋષિ સુનક અને તેમના પત્ની અક્ષતા મૂર્તિએ ઈન્ડિયા પેવેલિયનની ખાસ મુલાકાત લીધી હતી, જ્યાં તેમણે ભારતના સમકાલીન કલાકારોની સર્જનાત્મકતા અને વારસાના મુક્તકંઠે વખાણ કર્યા હતા.

ભારતીય પેવેલિયનની ખાસ થીમ: 'જિયોગ્રાફીઝ ઓફ ડિસ્ટન્સ'

ઈન્ડિયા પેવેલિયનની આ વખતની થીમ "જિયોગ્રાફીઝ ઓફ ડિસ્ટન્સ: રિમેમ્બરિંગ હોમ" રાખવામાં આવી છે. આ પ્રદર્શનમાં પાંચ અગ્રણી સમકાલીન ભારતીય કલાકારોની અનોખી કલાકૃતિઓ મૂકવામાં આવી છે. કલાકારોએ પોતાની પરંપરાગત શૈલી અને આધુનિક વિચારધારાનું સંયોજન કરીને ઘર, સાંસ્કૃતિક ઓળખ, પોતાનાપણું અને સશક્તિકરણની વિભાવનાઓને ખૂબ જ સુંદર રીતે કેનવાસ અને શિલ્પો પર કંડારી છે.

૧૮૯૫થી શરૂ થયેલું વિશ્વનું સૌથી જૂનું કલા પ્રદર્શન

વેનિસ બિએનાલેની સ્થાપના ૧૮૯૫માં કરવામાં આવી હતી અને તે વિશ્વના સૌથી જૂના, પ્રતિષ્ઠિત અને પ્રભાવશાળી સમકાલીન કલા પ્રદર્શનોમાંનું એક ગણાય છે. ૯ મેથી શરૂ થયેલું આ આંતરરાષ્ટ્રીય પ્રદર્શન ૨૨ નવેમ્બર, ૨૦૨૬ સુધી ચાલશે. જેમાં વિશ્વભરના જાણીતા કલાકારો, સંગ્રહકો, વિવેચકો અને કલાપ્રેમીઓ ચિત્રો, શિલ્પો, વિડિયો આર્ટ અને પ્રદર્શન સ્થાપનો (Installations) જોવા માટે મોટી સંખ્યામાં એકઠા થાય છે.

સંસ્કૃતિ મંત્રાલયનું ખાસ આમંત્રણ

ભારતના સંસ્કૃતિ મંત્રાલયે સોશિયલ મીડિયા પ્લેટફોર્મ ઇન્સ્ટાગ્રામ પર ઈન્ડિયા પેવેલિયનની ખાસ ઝલક શેર કરી હતી અને પ્રવાસીઓ તથા ભારતીય નાગરિકોને વેનિસ ખાતે આ વૈશ્વિક મંચની મુલાકાત લેવા આગ્રહભર્યું આમંત્રણ આપ્યું હતું. મંત્રાલયે જણાવ્યું કે આ પેવેલિયન વિશ્વ મંચ પર વિકસતા ભારતની એક સુંદર વાર્તા અને વિવિધ કલાત્મક વિચારોનું સશક્ત ઉજવણી છે.