મુંબઈ : વર્ષ ૨૦૨૬ના પ્રથમ છ મહિના (જાન્યુઆરીથી જૂન) દરમિયાન સિંગાપોરના પ્રવાસન ઉદ્યોગ માટે ભારત એક અત્યંત મહત્વપૂર્ણ અને સક્રિય બજાર તરીકે સાબિત થયું છે. સિંગાપોર ટુરિઝમ બોર્ડ (STB) દ્વારા જાહેર કરવામાં આવેલા તાજેતરના આંકડા મુજબ, આ સમયગાળામાં ૬ લાખથી વધુ ભારતીય પ્રવાસીઓએ સિંગાપોરની મુલાકાત લીધી છે. વૈશ્વિક પડકારો વચ્ચે પણ ભારતીય મુસાફરોની આ સતત વધતી સંખ્યાએ સિંગાપોરના પ્રવાસન ક્ષેત્રને નવી ઊંચાઈ આપી છે.

ખર્ચની બાબતમાં પણ ભારતીયો સૌથી આગળ

સિંગાપોર ટુરિઝમ બોર્ડના ડેટા દર્શાવે છે કે ભારતીય પ્રવાસીઓ માત્ર મુલાકાત લેવામાં જ નહીં, પરંતુ ખર્ચ કરવામાં પણ મોખરે રહ્યા છે. વર્ષ ૨૦૨૬ના પ્રથમ ત્રિમાસિક ગાળામાં ભારતીય પ્રવાસીઓએ કુલ ૨૭.૪ કરોડ સિંગાપોર ડોલરનો ભારેખમ ખર્ચ કર્યો હતો. વર્ષના પ્રથમ છ મહિનામાં સિંગાપોરમાં વિશ્વભરમાંથી કુલ ૮૧.૯ લાખ આંતરરાષ્ટ્રીય મુલાકાતીઓ આવ્યા હતા, જેમાં ભારતીયોનો ફાળો નોંધપાત્ર રહ્યો છે.

એરલાઇન્સ અને ટ્રાવેલ પાર્ટનર્સ સાથે મજબૂત સંબંધો

સિંગાપોર ટુરિઝમ બોર્ડના પ્રાદેશિક ડિરેક્ટર (ભારત, મધ્યપૂર્વ, દક્ષિણ એશિયા અને આફ્રિકા) માર્કસ ટેને જણાવ્યું હતું કે, "ભારતીય પ્રવાસીઓ, એરલાઇન ભાગીદારો અને ટ્રાવેલ વેપારીઓ સાથેના અમારા વર્ષો જૂના સબંધો આ સફળતાનું મુખ્ય કારણ છે." તેમણે ઉમેર્યું હતું કે સિંગાપોરને ભારતીય પ્રવાસીઓ માટે વધુ સુલભ, ગુણવત્તાયુક્ત અને આકર્ષક બનાવવા માટે ફ્લાઇટ કનેક્ટિવિટી અને બિઝનેસ ઇવેન્ટ્સ ક્ષેત્રે સહયોગ વધારવામાં આવી રહ્યો છે.

૨૦૨૫ના આંકડા અને વૈશ્વિક રેન્કિંગ

નોંધનીય છે કે વર્ષ ૨૦૨૫ દરમિયાન સિંગાપોરમાં કુલ ૧.૬૯ કરોડ આંતરરાષ્ટ્રીય મુલાકાતીઓ નોંધાયા હતા. જેમાં ૩૧ લાખ સાથે ચીન પ્રથમ, ૨૪ લાખ સાથે ઇન્ડોનેશિયા બીજા, જ્યારે મલેશિયા અને ઓસ્ટ્રેલિયા ૧૩-૧૩ લાખ સાથે આગળ રહ્યા હતા. ભારતે ૧૨ લાખ મુલાકાતીઓની સંખ્યા સાથે વિશ્વમાં પાંચમું સ્થાન મેળવ્યું હતું. ભારતમાંથી વધતી જતી પ્રવાસન ક્ષમતાને ધ્યાનમાં રાખીને સિંગાપોર હવે ભારતીય મુસાફરો માટે નવા એનિમેશન, આકર્ષણો અને ખાસ પેકેજો રજૂ કરી રહ્યું છે.