નેપાળ : તિબેટની સરહદે આવેલા બે મધ્ય નેપાળ જિલ્લાઓમાં અચાનક, પ્રચંડ પૂર આવ્યું, જેમાં ૧૫૦ થી વધુ લોકો માર્યા ગયા, નદી કિનારે વસાહતોમાં વ્યાપક વિનાશ થયો અને ઓછામાં ઓછા એક ડઝન જળવિદ્યુત પ્રોજેક્ટ્સને બુધવારે વહેલી સવારે નુકસાન થયું. અધિકારીઓએ જણાવ્યું હતું કે તિબેટ બાજુથી આવતા ભોટે કોશી નદીમાં પૂર આવ્યું હતું અને કાઠમંડુના દક્ષિણપશ્ચિમમાં તિબેટ અને નુવાકોટ જિલ્લાની સરહદે આવેલા રાસુવા અને ધાડિંગ જિલ્લાઓને અસર કરી હતી.
નેપાળ ટુરિઝમ બોર્ડના એક નિવેદન અનુસાર, રાસુવા પૂરને કારણે કુલ ૩૮૪ પ્રવાસીઓ, ૨૯૧ વિદેશીઓ અને ૯૩ નેપાળી નાગરિકો ગુમ થયા છે.

નેપાળ પોલીસે જણાવ્યું હતું કે આ દુર્ઘટના બાદ ૧૫૭ મૃતદેહો મળી આવ્યા છે, જેમાં સૌથી વધુ મૃત્યુ ચિત્વનમાં નોંધાયા છે, જ્યાં ૬૪ મૃતદેહો મળી આવ્યા છે.
જિલ્લા પ્રમાણે મૃત્યુઆંક ચિત્વનમાં ૬૪, ધાડિંગમાં ૨૭, નવલપરાસી પૂર્વમાં ૨૨, ગોરખામાં ૧૯, નુવાકોટમાં ૧૩, તાનાહુનમાં નવ અને રાસુવામાં ત્રણ છે.
પોલીસે એમ પણ જણાવ્યું હતું કે ૪૯ ઘાયલોને હોસ્પિટલોમાં સારવાર આપવામાં આવી રહી છે, જ્યારે ૩,૩૦૦ થી વધુ પોલીસ કર્મચારીઓને બચાવ અને પુનઃપ્રાપ્તિ કામગીરી ચાલુ હોવાથી તૈનાત કરવામાં આવ્યા છે.

નાણા મંત્રાલયના જણાવ્યા અનુસાર, વિશ્વ બેંકે બુધવારે પૂરગ્રસ્ત નેપાળને અસરગ્રસ્ત વિસ્તારોના બચાવ, રાહત અને પુનર્નિર્માણ માટે ૨૫ અબજ રૂપિયાની કટોકટી નાણાકીય સહાયની ઓફર કરી હતી.

ભારતમાં નેપાળ દૂતાવાસના ચાર્જ ડી અફેર્સ ડૉ. સુરેન્દ્ર થાપા કહે છે, "આ દુર્ઘટનાનું પ્રમાણ અને ઘણા દેશોના વિદેશી નાગરિકો સહિત ગુમ થયેલા લોકોની સંખ્યાને ધ્યાનમાં રાખીને, અમારી તાત્કાલિક પ્રાથમિકતા શોધ અને બચાવ, જીવન બચાવવા અને અસરગ્રસ્તોને સહાય પૂરી પાડવાની છે. અમે પરિસ્થિતિની ચકાસણી કરવા માટે કામ કરતી વખતે અસરગ્રસ્ત દરેકને શોધવા અને મદદ કરવા માટે તમામ પ્રયાસો કરી રહ્યા છીએ. શોધ અને બચાવ કામગીરી ચાલુ રહેતાં વધુ અપડેટ્સ આવશે."

 'ભારત સરકાર નેપાળની સાથે ઉભી છે': ગૃહમંત્રી અમિતભાઈ શાહ

કેન્દ્રીય ગૃહમંત્રી અમિતભાઈ શાહે ટ્વીટ કર્યું, "નેપાળમાં પૂરથી થયેલી તબાહી અત્યંત દુઃખદ છે. મારી સંવેદના એ પરિવારો સાથે છે જેમણે આ આફતમાં પોતાના પ્રિયજનો ગુમાવ્યા છે. આ સંકટની ઘડીમાં, ભારત સરકાર નેપાળની સાથે ઉભી છે.

મેં નેપાળમાં આ આફત અંગે બિહાર અને ઉત્તર પ્રદેશના મુખ્યમંત્રીઓ સાથે વાત કરી છે. સરહદી વિસ્તારોમાં જ્યાં તેની અસર અનુભવાઈ શકે છે ત્યાં સ્થાનિક વહીવટીતંત્ર અને રાહત-બચાવ ટીમો સાથે એનડીઆરએફ ને પણ હાઇ એલર્ટ પર રાખવામાં આવ્યું છે."