નવી દિલ્હી, તા.૨૭: ભારત ૨૦૩૬ના ઓલિમ્પિક્સ રમતોત્સવની યજમાની કરવા માટે ગંભીરતાથી તૈયારીઓ કરી રહ્યું છે ત્યારે વડાપ્રધાન નરેન્દ્ર મોદીએ દેશના રમતગમત ક્ષેત્ર માટે એક મોટો અને સાહસિક વિઝન પ્લાન રજૂ કર્યો છે. 'ખેલો ઇન્ડિયા ડાયલોગ' દરમિયાન દેશના યુવાનો અને રમતવીરોને વર્ચ્યુઅલી સંબોધિત કરતા વડાપ્રધાને એક કડવું સત્ય સ્વીકારતા કહ્યું હતું કે, ભારત ઓલિમ્પિકમાં રમાતી અડધાથી વધુ રમતોમાં ભાગ જ લેતું નથી, જેના કારણે આપણો મેડલ ગ્રાફ મર્યાદિત રહે છે.

કડવું સત્ય અને મોટો પડકાર
પીએમ મોદીએ ભારપૂર્વક જણાવ્યું કે, ૨૦૧૨ના લંડન ઓલિમ્પિક્સમાં ભારતે માત્ર ૧૩ રમત શાખાઓમાં ભાગ લીધો હતો, જ્યારે ૨૦થી વધુ રમતોમાં આપણું કોઈ પ્રતિનિધિત્વ જ નહોતું. જ્યારે ભારત પોતાની મેડલ સંખ્યા વધારવા માંગતું હોય, ત્યારે આપણે સ્પર્ધાનો વ્યાપ વધારવો જ પડશે.

"મેં લાલ કિલ્લા પરથી પણ આ મુદ્દો ઉઠાવ્યો હતો. આપણે એવી રમતોમાં પણ મેડલ જીતવાની ક્ષમતા કેળવવી પડશે જેના વિશે દેશમાં ઘણા લોકોએ સાંભળ્યું પણ નથી," પીએમ મોદીએ ઉમેર્યું.

ભારતની ભૌગોલિક શક્તિનો થશે ઉપયોગ
વડાપ્રધાને ઉલ્લેખ કર્યો કે ભારત પાસે વિશાળ દરિયાકિનારો, હિમાલય જેવા પર્વતો અને વિવિધ ભૌગોલિક વિવિધતા છે. આ કુદરતી સંપત્તિનો ઉપયોગ કરીને દેશ નવી રમતોમાં વૈશ્વિક સ્તરે નામના મેળવી શકે છે:

•    વોટર સ્પોર્ટ્સ અને સર્ફિંગ: વિશાળ સમુદ્રી કાંઠાનો ઉપયોગ કરીને સર્ફિંગ અને વોટર રમતો પ્રોત્સાહિત કરાશે.

•    માઉન્ટેન અને સ્પોર્ટ્સ ક્લાઇમ્બિંગ: પર્વતીય પ્રદેશોમાં સ્પોર્ટ્સ ક્લાઇમ્બિંગ માટે ઇકોસિસ્ટમ બનાવવામાં આવશે.

•    શિયાળુ રમતો (Winter Sports): બરફાચ્છાદિત વિસ્તારોમાંથી શિયાળુ રમતોના સાહસિક ખેલાડીઓ તૈયાર કરવામાં આવશે.

૫ થી ૧૫ વર્ષના બાળકો માટે રાષ્ટ્રવ્યાપી મિશન
૨૦૩૬ના ઓલિમ્પિક્સને ધ્યાનમાં રાખીને સરકારે ૫ થી ૧૫ વર્ષની વયના બાળકો માટે વિશેષ 'ટેલેન્ટ હન્ટ' (પ્રતિભા શોધ) કાર્યક્રમની જાહેરાત કરી છે.

આ અભિયાન હેઠળ માત્ર બાળકને કઈ રમતમાં રસ છે તે જ નહીં, પરંતુ તેનું શરીર અને ક્ષમતા કઈ રમત માટે સૌથી વધુ યોગ્ય છે તે વૈજ્ઞાનિક રીતે નક્કી કરીને તેને નાનપણથી જ આંતરરાષ્ટ્રીય સ્તરનું કોચિંગ આપવામાં આવશે. પીએમ મોદીએ યુવા ખેલાડીઓને ખાતરી આપી હતી કે રમતગમતમાં કારકિર્દી બનાવવામાં સરકાર તેમની સાથે ખભેખભા મિલાવીને ઊભી રહેશે.