નવી દિલ્હી :  દિલ્હીના ઐતિહાસિક જંતર-મંતર પર દેશભરમાંથી એકઠા થયેલા યુવાનો અને "અનામત હટાવો આંદોલન"ના વિશાળ વિરોધ પ્રદર્શન બાદ દેશના રાજકારણમાં ભારે ગરમાવો આવી ગયો છે. શિક્ષણ અને સરકારી નોકરીઓમાં જાતિ આધારિત અનામતના સંપૂર્ણ પુનર્ગઠનની માંગણી સાથે ચાલી રહેલા આ આંદોલન વચ્ચે કેન્દ્રીય મંત્રી અને ભાજપના રાષ્ટ્રીય અધ્યક્ષ જેપી નડ્ડાએ આંદોલનના મુખ્ય પ્રતિનિધિઓ સાથે એક મહત્વપૂર્ણ બેઠક કરી છે. જંતર-મંતર પર કાયદો અને વ્યવસ્થા જાળવવા માટે દિલ્હી પોલીસ અને કેન્દ્રીય દળોની ભારે તૈનાતી વચ્ચે યોજાયેલી આ બેઠકે સમગ્ર દેશનું ધ્યાન ખેંચ્યું છે.

બેઠક બાદ કેન્દ્રીય મંત્રી જેપી નડ્ડાએ સોશિયલ મીડિયા પ્લેટફોર્મ "X" પર માહિતી આપતાં જણાવ્યું કે તેઓ પૂર્વનિર્ધારિત કાર્યક્રમ મુજબ પ્રતિનિધિમંડળના મુખ્ય સભ્યો હર્ષ દુબે, મૃત્યુંજય પાઠક અને રણ બહાદુર સિંહ ચૌહાણ સાથે મળ્યા હતા અને આ મુદ્દે ટૂંક સમયમાં જ બીજા તબક્કાની બેઠક યોજાશે. બીજી તરફ, આંદોલનના અગ્રણી નેતા હર્ષ દુબેએ આ મુલાકાતને સકારાત્મક સંવાદ તરફનું એક મહત્વપૂર્ણ પગલું ગણાવ્યું હતું. તેમણે સ્પષ્ટ કર્યું હતું કે તેમનો ઉદ્દેશ્ય કોઈ ચોક્કસ વર્ગનો વિરોધ કરવાનો નથી પરંતુ રાષ્ટ્રીય હિતમાં સમાન તકો, યોગ્ય ન્યાયી વ્યવસ્થા અને આર્થિક સુધારા માટે શાંતિપૂર્ણ રીતે પોતાનો અવાજ બુલંદ કરવાનો છે.

નોંધનીય છે કે 'અનામત હટાવો આંદોલન' ની મુખ્ય માંગણી એ છે કે દેશમાં અનામત સામાજિક કે જાતિ ઓળખના બદલે માત્ર આર્થિક સ્થિતિ પર આધારિત હોવી જોઈએ. આ ઉપરાંત, પ્રદર્શનકારીઓએ 'એક પરિવાર, એક અનામત' નીતિ લાગુ કરવા અને યુજીસીના ૨૦૨૬ના જાતિ-સમાનતા નિર્દેશોને તાત્કાલિક પાછા ખેંચવાની પણ માંગ કરી છે. સોશિયલ મીડિયા પ્લેટફોર્મ ઇન્સ્ટાગ્રામ પર ૫.૬ મિલિયનથી વધુ ફોલોઅર્સ ધરાવતું આ જૂથ હવે ડિજિટલ સ્પેસમાંથી બહાર આવીને જમીની સ્તરે એક મોટો વિરોધ અવાજ બની ગયું છે, જેના કારણે કેન્દ્ર સરકાર પણ તેમની સાથે સંવાદના માર્ગે આગળ વધી રહી છે.