વોશિંગ્ટન:અમેરિકાના પાવર ગ્રીડ અને સંવેદનશીલ ઉર્જા માળખાને વિદેશી દળોના સાઇબર હુમલા, તોડફોડ અને અણધારી આડઅસરોના જોખમોથી બચાવવા માટે પ્રમુખ ડોનાલ્ડ ટ્રમ્પે એક મોટો એક્ઝિક્યુટિવ ઓર્ડર સાઇન કરીને દેશમાં રાષ્ટ્રીય કટોકટી (નેશનલ ઇમરજન્સી) જાહેર કરી છે. આ ઓર્ડર ‘ઇન્ટરનેશનલ ઇમરજન્સી ઇકોનોમિક પાવર્સ એક્ટ’ અને ‘નેશનલ ઇમરજન્સી એક્ટ’ હેઠળ જારી કરવામાં આવ્યો છે.

નવા નિયમ હેઠળ, અમેરિકાના બલ્ક-પાવર સિસ્ટમમાં ઉપયોગમાં લેવાતા વિદેશી ઉત્પાદિત ઇલેક્ટ્રિક સાધનો, સોફ્ટવેર અને ડિજિટલ સિસ્ટમ્સ કે જે રાષ્ટ્રીય સુરક્ષા માટે ખતરો બની શકે છે, તેની ખરીદી, સ્થાપના કે ઉપયોગ પર સંપૂર્ણ પ્રતિબંધ મૂકી દેવામાં આવ્યો છે અથવા કડક શરતો આધીન કરવામાં આવ્યો છે. આ ઓર્ડરમાં જણાવાયું છે કે વિદેશી શક્તિઓ પાવર સિસ્ટમની નાજુક કડીઓનો ઉપયોગ કરીને તોડફોડ, અનાધિકૃત એક્સેસ, વીજ પુરવઠામાં વિક્ષેપ અને નાગરિક માળખાને નુકસાન પહોંચાડવાનું જોખમ ઊભું કરી રહી છે. જોકે, સ્થાનિક વીજ વિતરણ (લોકલ ડિસ્ટ્રિબ્યુશન) ની સુવિધાઓને આ ઓર્ડરમાંથી મુક્તિ આપવામાં આવી છે.

આ ઓર્ડર દ્વારા ઉર્જા મંત્રીને અન્ય કેબિનેટ સભ્યોની સલાહથી પાવર સિસ્ટમમાં રહેલા જોખમી સાધનોની ઓળખ કરવા, નવા કડક નિયમો લાગુ કરવા તેમજ હાલમાં વપરાતા ઉપકરણો પર સુરક્ષા, વિશ્વસનીયતા અને વિકલ્પોની ઉપલબ્ધતાને ધ્યાનમાં રાખીને મર્યાદાઓ મૂકવાની વિશેષ સત્તાઓ સોંપાઈ છે.

અમેરિકામાં એડવાન્સ્ડ મેન્યુફેક્ચરિંગ, આર્ટિફિશિયલ ઇન્ટેલિજન્સ (AI) અને સંરક્ષણ ઉત્પાદન ક્ષેત્રના ઝડપી વિકાસને કારણે વીજ માંગમાં મોટો ઉછાળો આવ્યો છે, જેને પગલે વિદેશી ઘટકો પર નિર્ભરતા વધી હતી. અમેરિકાની રાષ્ટ્રીય સુરક્ષા, વિદેશ નીતિ અને આર્થિક તાકાત મજબૂત કરવાના હેતુથી વિદેશી સપ્લાય ચેઈનની આ નબળાઈઓને દૂર કરવા આ નિર્ણાયક પગલું ભરવામાં આવ્યું છે.

ઉલ્લેખનીય છે કે, પ્રમુખ ટ્રમ્પે તેમના પ્રથમ કાર્યકાળ દરમિયાન સેક્શન ૨૩૨ હેઠળ સ્ટીલ અને એલ્યુમિનિયમ જેવા ઉદ્યોગોને પ્રોત્સાહન આપવા ટેરિફ લાદી વેપાર નીતિમાં મોટો સુધારો કર્યો હતો. આ સિવાય તાજેતરમાં સ્ટીલ, એલ્યુમિનિયમ, કોપર, સોલાર પોલિસિલિકોન, ટ્રક, ઓટોમોબાઈલ, લાકડું, સેમિકન્ડક્ટર અને ફાર્માસ્યુટિકલ્સ પર પણ ટેરિફ મજબૂત કરવામાં આવ્યા છે.

એપ્રિલ ૨૦૨૫માં પ્રમુખ ટ્રમ્પે વીજ ગ્રીડ સુરક્ષા ઓર્ડર દ્વારા પર્યાવરણીય નિયમોના અતિરેકને કારણે બંધ થવાના આરે પહોંચેલા ૧૭,૦૦૦ મેગાવોટના પાવર પ્લાન્ટ્સને રક્ષણ આપ્યું હતું, જે ૧૨.૭૫ મિલિયન ઘરોને વીજળી પૂરી પાડવા માટે પૂરતા હતા. ત્યારબાદ જૂન ૨૦૨૬માં AI ઈનોવેશન અને સાયબર સિક્યોરિટી, જુલાઈ ૨૦૨૬માં ડિફેન્સ સપ્લાય ચેઈન સુરક્ષા અને ઓગસ્ટ ૨૦૨૬માં ડ્રોન તથા તેના પાર્ટ્સની આયાત સામે રાષ્ટ્રીય સુરક્ષા સુનિશ્ચિત કરવા માટે મહત્વપૂર્ણ એક્ઝિક્યુટિવ ઓર્ડર અને ઘોષણાઓ કરવામાં આવી છે.