બિલાસપુર તા.28: છત્તીસગઢના બિલાસપુરમાં આવેલા બિલાસદેવી કેવત એરપોર્ટ (ચક્કરભટ્ટા) ખાતે શુક્રવારે સાંજે એક મોટી વિમાન દુર્ઘટના થતાં થતાં રહી ગઈ છે. રાષ્ટ્રીય રાજધાની દિલ્હીથી બિલાસપુર આવી રહેલી 'એલાયન્સ એર' (Alliance Air) ની ફ્લાઇટ નંબર 91697 રનવે પર લેન્ડ કરી રહી હતી, તે જ સમયે અચાનક વિમાનનું ટાયર ધડાકાભેર ફાટી ગયું હતું. અચાનક થયેલા વિસ્ફોટક અવાજને કારણે એરપોર્ટ પર તૈનાત અધિકારીઓ અને કર્મચારીઓમાં ભારે ગભરાટ અને અફરાતફરીનો માહોલ સર્જાયો હતો.

લેન્ડિંગની અત્યંત સંવેદનશીલ ક્ષણોમાં જોરદાર ધડાકા સાથે ટાયર ફાટવા છતાં ફ્લાઇટના પાઇલટે અસાધારણ ધીરજ, સૂઝબૂઝ અને ત્વરિત કંટ્રોલ દર્શાવ્યો હતો. પાઇલટે ભારે પવન અને ઘર્ષણ વચ્ચે વિમાનનું સંતુલન ગુમાવવા દીધું ન હતું અને અત્યંત કુશળતાપૂર્વક પ્લેનને રનવેની બાજુમાં સુરક્ષિત રીતે રોકી લીધું હતું. ઘટનાની જાણ થતાં જ એરપોર્ટની ફાયર બ્રિગેડ અને રેસ્ક્યુ ટીમ તાત્કાલિક પ્લેન તરફ દોડી ગઈ હતી. સૌથી રાહતની વાત એ રહી કે વિમાનમાં સવાર તમામ મુસાફરો સંપૂર્ણપણે સુરક્ષિત છે અને કોઈને પણ નાની-મોટી ઈજા પહોંચી નથી.

આ ઘટના બાદ સુરક્ષાના કારણોસર અને ટેકનિકલ ખામી દૂર કરવા માટે બિલાસપુરથી આગળ પ્રયાગરાજ જતી કનેક્ટિંગ ફ્લાઇટને તાત્કાલિક અસરથી રદ કરવામાં આવી હતી. અચાનક ફ્લાઇટ રદ થવાને કારણે આગળ મુસાફરી કરી રહેલા પ્રવાસીઓને ભારે અસુવિધા અને મુશ્કેલીઓનો સામનો કરવો પડ્યો હતો, જોકે વિમાન કંપની દ્વારા તેમના માટે વૈકલ્પિક વ્યવસ્થા અને રિફંડની પ્રક્રિયા હાથ ધરવામાં આવી છે.