કોલકાતા:  પશ્ચિમ બંગાળના રાજકારણમાં ગરમાવો લાવતા તૃણમૂલ કોંગ્રેસના સુપ્રિમો અને મુખ્યમંત્રી મમતા બેનર્જીએ ભાજપ અને કેન્દ્ર સરકાર સામે યુદ્ધનું આહ્વાન કર્યું છે. તૃણમૂલ છાત્ર પરિષદના સ્થાપના દિવસ નિમિત્તે યોજાયેલી વિશાળ સભાને સંબોધતા મમતા બેનર્જીએ સ્પષ્ટ શબ્દોમાં ચેતવણી આપી હતી કે ટીએમસીને આવી ધમકીઓ કે કેસોથી દબાવી શકાશે નહીં. પાર્ટી કાર્યકરો સામે દાખલ કરવામાં આવેલા ૧૪,૦૦૦ કેસોનો ઉલ્લેખ કરીને તેમણે ભારપૂર્વક જણાવ્યું કે સુપ્રીમ કોર્ટ ઉપરાંત જરૂર જણાશે તો તેઓ આંતરરાષ્ટ્રીય કોર્ટ સુધી જવા માટે પણ અચકાશે નહીં.

પોતાના સંબોધનમાં મમતા બેનર્જીએ યુવા કાર્યકર્તાઓ અને વિદ્યાર્થીઓમાં જોશ પૂરતાં કહ્યું કે લોકશાહીના રક્ષણ માટે રસ્તા પર ઉતરીને વિરોધ પ્રદર્શન કરવું જરૂરી છે. તેમણે કહ્યું કે, "જરૂર પડે તો એક મહિના માટે જેલનું ભોજન ખાઓ, પણ કોઈ પણ સંજોગોમાં ભાજપ સામે ઝૂકશો નહીં." આ સાથે જ તેમણે વિરોધ પ્રદર્શનો માટે પોલીસ અને વહીવટીતંત્રની પરવાનગી લેવાની પ્રક્રિયા પર પણ આકરા પ્રહારો કર્યા હતા અને ઉમેર્યું હતું કે જો પોલીસ પરવાનગી નહીં આપે તો તેઓ સીધા જનતાના દરબારમાં જઈને લોકો પાસે જ પરવાનગી માંગશે.

પોલીસ અને વહીવટીતંત્ર પર નિશાન સાધતા મમતા બેનર્જીએ આરોપ લગાવ્યો હતો કે તેમના નિવાસસ્થાન આસપાસના રસ્તાઓ બંધ કરીને સામાન્ય જનતાને હેરાન કરવામાં આવી રહી છે. તેમણે પોતાના કાર્યકરોને એમ્બ્યુલન્સ અને ઈમરજન્સી વાહનો માટે રસ્તો સાફ રાખવા અને પોલીસને સહકાર આપવા સૂચના આપી હતી. મમતા બેનર્જીના આ આક્રમક વલણ અને જિલ્લા પ્રવાસની જાહેરાતથી સ્પષ્ટ થાય છે કે આંતરિક રાજકીય ખેંચતાણ વચ્ચે બંગાળની રાજનીતિ આવનારા દિવસોમાં વધુ ગરમ અને રોચક બનશે.