મુંબઈ : બોમ્બે હાઈકોર્ટે પ્રતિબંધિત પોપ્યુલર ફ્રન્ટ ઓફ ઈન્ડિયા (PFI) સાથે સંકળાયેલા એક કેસમાં મહત્વપૂર્ણ ટિપ્પણી કરતા આરોપી મોહમ્મદ ઈકબાલ ઈબ્રાહિમ ખાનને જામીન મંજુર કર્યા છે. જસ્ટિસ સારંગ કોટવાલ અને જસ્ટિસ આર.આર. ભોંસલેની બેન્ચે સ્પષ્ટ કર્યું છે કે કોઈપણ વ્યક્તિના ફોનમાં માત્ર પેટ્રોલ બોમ્બ કેવી રીતે બનાવવો તે દર્શાવતો વીડિયો હોવો એ પોતાનામાં કોઈ ફોજદારી ગુનો સાબિત નથી કરતો, સિવાય કે તે વીડિયો દ્વારા કોઈને ઉશ્કેરવામાં આવ્યા હોવાના પુરાવા હોય.

મહારાષ્ટ્ર આતંકવાદ વિરોધી ટુકડી (ATS) દ્વારા સપ્ટેમ્બર ૨૦૨૨માં ખાનની ધરપકડ કરવામાં આવી હતી અને તે ત્યારથી ન્યાયિક કસ્ટડીમાં હતો. ફરિયાદ પક્ષનો આરોપ હતો કે ખાન PFI નો સક્રિય સભ્ય હતો અને સરકાર વિરુદ્ધના કાવતરામાં સામેલ હતો. તપાસ દરમિયાન તેના મોબાઈલ ફોનમાંથી પેટ્રોલ બોમ્બ બનાવવાની રીતનો વીડિયો મળી આવ્યો હતો. જોકે, હાઈકોર્ટે નોંધ્યું હતું કે ખાને આ વીડિયો અન્ય કોઈને ફોરવર્ડ કર્યો હોય કે તેનો દુરુપયોગ કરવા માટે કોઈને પ્રેરિત કર્યા હોય તેવા કોઈ ઠોસ પુરાવા ફરિયાદ પક્ષ રજૂ કરી શક્યો નથી.

કોર્ટે એમ પણ અવલોકન કર્યું હતું કે આ કેસમાં ફરિયાદ પક્ષ લગભગ ૯૦ સાક્ષીઓની તપાસ કરવા માગે છે અને હજુ સુધી ટ્રાયલ પણ શરૂ થઈ નથી. ન્યાયિક પ્રક્રિયામાં થનારા લાંબા વિલંબ અને કસ્ટડીની અવધિને ધ્યાનમાં રાખીને અદાલતે આરોપીને શરતી જામીન પર મુક્ત કરવાનો આદેશ આપ્યો છે.