નવી દિલ્હી : નેપાળ અને તિબેટ સરહદ પર આવેલા વિનાશક પૂરના કારણે કૈલાશ માનસરોવર યાત્રાએ ગયેલા શ્રદ્ધાળુઓ લાપતા થવાની ઘટનાએ સમગ્ર દેશને હચમચાવી દીધો છે. આ દુર્ઘટના પર આધ્યાત્મિક ગુરુ સદગુરુનો એક ભાવુક વીડિયો સામે આવ્યા બાદ ભારતીય બેડમિન્ટન સ્ટાર પીવી સિંધુએ પણ પોતાની ઊંડી સંવેદનાઓ વ્યક્ત કરી છે. સદગુરુએ ઈશા ફાઉન્ડેશનના યાત્રાળુઓ ગુમ થવા પર અને સત્તાવાર માહિતીના અભાવે દુઃખ વ્યક્ત કર્યું હતું, જેના પર પ્રતિક્રિયા આપતા સિંધુએ જણાવ્યું કે તેમણે ક્યારેય સદગુરુને આટલા હચમચી ગયેલા જોયા નથી.

પીવી સિંધુએ વધુમાં ખુલાસો કર્યો હતો કે તેમના પોતાના માતા-પિતા પણ આ કૈલાશ યાત્રા પર જવાના હતા, પરંતુ છેલ્લી ઘડીએ આ પ્રવાસ રદ થયો હતો. આ વાતનો ઉલ્લેખ કરતા તેમણે કહ્યું કે જીવન ક્યારે અને કેવી રીતે બદલાઈ જાય છે તેની કોઈ ખાતરી નથી, તેથી પોતાના પ્રિયજનોની નજીક રહો. દુર્ઘટનાના ભયાનક દ્રશ્યો સોશિયલ મીડિયા પર શેર કરી રહેલા યુઝર્સને અપીલ કરતા સિંધુએ જણાવ્યું કે પીડિતોની અંતિમ ક્ષણોના વીડિયો શેર કરવાથી બચવું જોઈએ, કારણ કે તે કોઈના માતા, પિતા કે ભાઈ-બહેન હતા. પરિવારોએ સોશિયલ મીડિયા દ્વારા પોતાના સ્વજનોના દુઃખદ અંતના સાક્ષી બનવું પડે તે અત્યંત પીડાદાયક છે.

ઉલ્લેખનીય છે કે તિબેટના ગૈરોંગ ખાતે આવેલા અચાનક પૂરમાં ઈશા જૂથના સભ્યો ઇમિગ્રેશન સેન્ટરમાં ફસાઈ ગયા હતા અને તે ઇમારત પાણીમાં ધોવાઈ ગઈ હતી. આ ભયંકર પૂર અને ભૂસ્ખલનને કારણે સેંકડો લોકો પ્રભાવિત થયા છે, જ્યારે રસ્તાઓ અને પુલો તૂટી જવાના કારણે બચાવ કામગીરીમાં ભારે મુશ્કેલીઓનો સામનો કરવો પડી રહ્યો છે.