નવી દિલ્હી : ઈરાન અને અમેરિકા વચ્ચેના તણાવમાં મધ્યસ્થી બનવાની કોશિશમાં આંતરરાષ્ટ્રીય સ્તરે ભારે ફજેતી અને અપમાન સહન કર્યા બાદ પાકિસ્તાને હવે પોતાનો પેંતરો બદલ્યો છે. રાજકીય અને આંતરરાષ્ટ્રીય દબાણ હેઠળ ઘેરાયેલા પાકિસ્તાનના આર્મી ચીફ ફિલ્ડ માર્શલ અસીમ મુનીરે અચાનક વાહ સ્થિત 'પાકિસ્તાન ઓર્ડનન્સ ફેક્ટરી' (POF) ની મુલાકાત લેતાં સંરક્ષણ ક્ષેત્રે મોટો ખળભળાટ મચી ગયો છે. ગુપ્તચર સંસ્થાના સૂત્રોના જણાવ્યા અનુસાર, દેશમાં પોતાનું રાજકીય પલડું ભારે રાખવા માટે અસીમ મુનીર કોઈ મોટી લશ્કરી હિલચાલ કે યુદ્ધની યોજના ઘડી રહ્યા હોવાની પ્રબળ આશંકા સેવાઈ રહી છે.

સૂત્રોના જણાવ્યા મુજબ, પોતાની આ અણધારી મુલાકાત દરમિયાન આર્મી ચીફે શસ્ત્રો અને દારૂગોળાના ઉત્પાદન, ભંડાર, તેમજ સંરક્ષણ નિકાસ ક્ષમતાઓની ઊંડાણપૂર્વક સમીક્ષા કરી હતી. પાકિસ્તાન આયાતી હથિયારો પર પોતાની નિર્ભરતા ઘટાડીને સ્વદેશી ઉત્પાદન વધારવાના બહાને પોતાના શસ્ત્રાગારને મજબૂત કરી રહ્યું છે. આ દરમિયાન મુનીરે સ્થાનિક રીતે ડિઝાઇન કરાયેલા નવા હથિયારોના પરીક્ષણોનું નિરીક્ષણ કર્યું હતું. ઓર્ડનન્સ ફેક્ટરી સંકુલમાં બની રહેલા બે નવા ઔદ્યોગિક પ્લાન્ટ ચાલુ વર્ષના અંત સુધીમાં ધમધમતા થઈ જશે, જેનાથી પાકિસ્તાનની લશ્કરી ક્ષમતામાં મોટો વધારો થવાની ધારણા છે.

ઉલ્લેખનીય છે કે, અસીમ મુનીર અગાઉ પણ વિદેશી મંચો પરથી ભારતને સીધી લશ્કરી અને પરમાણુ હુમલાની ધમકીઓ આપી ચૂક્યા છે. ગુપ્તચર અહેવાલો સૂચવે છે કે ભારતના મહત્વપૂર્ણ માળખાકીય માળખા અને જળમાર્ગોને નિશાન બનાવવાની વાત કરીને મુનીર પાકિસ્તાની જનતાનું ધ્યાન દેશની આંતરિક નિષ્ફળતાઓથી હટાવવાનો પ્રયાસ કરી રહ્યા છે. વાહ ઓર્ડનન્સ ફેક્ટરીની આ મુલાકાત પણ ભારત સામે તણાવ વધારવાની અને સ્થાનિક સ્તરે સેનાનો દબદબો જાળવી રાખવાની વ્યાપક રણનીતિનો જ એક ભાગ માનવામાં આવી રહી છે.