તાશ્કંદ:  પ્રધાનમંત્રી નરેન્દ્ર મોદી 29 ઓગસ્ટે ઉઝબેકિસ્તાનની બે દિવસીય રાજ્ય મુલાકાતે રાજધાની તાશ્કંદ પહોંચ્યા છે. એરપોર્ટ પર ઉઝબેકિસ્તાનના રાષ્ટ્રપતિ શવકત મિર્ઝીયોયેવે પ્રોટોકોલ તોડીને પીએમ મોદીનું રેડ કાર્પેટ સ્વાગત કર્યું હતું. પીએમ મોદીની ઉઝબેકિસ્તાનની આ ચોથી મુલાકાત છે, જે મધ્ય એશિયા સાથે ભારતના ઐતિહાસિક અને સાંસ્કૃતિક સંબંધોને નવી ઊંચાઈ પર લઈ જવા માટે અત્યંત મહત્વપૂર્ણ માનવામાં આવે છે. આ પ્રવાસ દરમિયાન પીએમ મોદી તાશ્કંદમાં ભારતના પૂર્વ પ્રધાનમંત્રી લાલ બહાદુર શાસ્ત્રીના સ્મારકની મુલાકાત લેશે અને તાશ્કંદ સ્ટેટ યુનિવર્સિટી ઓફ ઓરિએન્ટલ સ્ટડીઝ ખાતે મહાત્મા ગાંધી સેન્ટરની પણ મુલાકાત લેશે.

બેઠકમાં બંને નેતાઓ વચ્ચે પ્રતિનિધિમંડળ સ્તરની દ્વિપક્ષીય વાટાઘાટો થશે, જેમાં દ્વિપક્ષીય વેપાર, રોકાણ, સંરક્ષણ સહયોગ, ડિજિટલ કનેક્ટિવિટી, આઈટી, ક્રિટિકલ મિનરલ્સ અને ઉર્જા જેવા ક્ષેત્રોમાં ભાગીદારી વધારવા પર વિશેષ ભાર મૂકવામાં આવશે. હાલમાં ભારત અને ઉઝબેકિસ્તાન વચ્ચે વાર્ષિક વેપાર અને રોકાણ લગભગ ૧ અબજ ડોલરની આસપાસ પહોંચી ગયું છે. પીએમ મોદીએ જણાવ્યું હતું કે આ વાટાઘાટોથી ભારતની સિક્યોરિટી, કનેક્ટિવિટી અને ઓપોર્ચ્યુનિટીની વ્યૂહરચના વધુ મજબૂત બનશે અને બંને દેશોના આર્થિક વિકાસને નવી ગતિ મળશે.

આ મુલાકાત પહેલાં તાશ્કંદના સ્થાનિક યુવા વિદ્યાર્થીઓએ સોશિયલ મીડિયા પર શુદ્ધ હિન્દીમાં પીએમ મોદીનું સ્વાગત કરતો એક વિશેષ વીડિયો શેર કર્યો હતો, જેને પીએમ મોદીએ સોશિયલ મીડિયા પ્લેટફોર્મ 'X' પર શેર કરીને વિદ્યાર્થીઓની હિન્દી ભાષા પરની પકડની મુક્ત મને પ્રશંસા કરી હતી. તાશ્કંદમાં દ્વિપક્ષીય વાટાઘાટો પૂર્ણ કર્યા બાદ, પ્રધાનમંત્રી નરેન્દ્ર મોદી કિરગિઝ રિપબ્લિકની રાજધાની બિશ્કેક જવા રવાના થશે, જ્યાં તેઓ 26મી શાંઘાઈ સહયોગ સંગઠન  સમિટમાં હાજરી આપશે અને રશિયન રાષ્ટ્રપતિ વ્લાદિમીર પુતિન સહિત વિશ્વના અગ્રણી નેતાઓ સાથે દ્વિપક્ષીય બેઠકો કરશે.