નવી દિલ્‍હી,તા.૩૧: વડાપ્રધાન નરેન્‍દ્રભાઈ મોદીએ પોતાના લોકપ્રિય રેડિયો કાર્યક્રમ મન કી બાતમાં નશામુક્‍ત યુવા ફોર વિકસિત ભારતના સંકલ્‍પ પર ભાર મૂકતા દેશભરમાં આ ઝુંબેશ તેજ બની ગઈ છે. સામાજિક ન્‍યાય અને અધિકારિતા મંત્રાલય દ્વારા સંચાલિત નશામુક્‍ત ભારત અભિયાન હવે દેશના ખૂણે-ખૂણે પહોંચી રહ્યું છે. હિન્‍દી, અંગ્રેજી, ઉર્દૂ અને ગુજરાતી પ્રસાર માધ્‍યમો સહિત સામાજિક માધ્‍યમો પર યુવા સર્જકો નશામુક્‍તિ માટે સંગીત, શેરી નાટકો અને ટૂંકી વિડિયો ક્‍લિપ્‍સ થકી અભૂતપૂર્વ લોકજાગળતિ ફેલાવી રહ્યા છે.

વડાપ્રધાન નરેન્‍દ્રભાઈ મોદીએ આજના મન કી બાત કાર્યક્રમમાં દેશના યુવાધનને નશાના દૂષણથી બચાવવા માટે એક વિશેષ આહ્વાન કર્યું છે. તેમણે સ્‍પષ્ટ શબ્‍દોમાં જણાવ્‍યું કે વિકસિત ભારતના નિર્માણ માટે દેશના યુવાનોનું નશામુક્‍ત અને તંદુરસ્‍ત હોવું અનિવાર્ય છે. ડ્રગ્‍સની લત માત્ર એક વ્‍યક્‍તિનું જીવન બરબાદ નથી કરતી, પરંતુ તેની ભયાનક અસરો આખા પરિવાર અને સમગ્ર સમાજ પર પડે છે. આથી આ લડાઈ માત્ર સરકાર પૂરતી સીમિત ન રહેતા સમગ્ર રાષ્‍ટ્રનું સામૂહિક જનઆંદોલન બનવી જોઈએ.

વડાપ્રધાનના આ સંબોધન બાદ દેશના વિવિધ પ્રાદેશિક અને રાષ્‍ટ્રીય સમાચાર માધ્‍યમોમાં આ વિષયને વ્‍યાપક સ્‍થાન મળ્‍યું છે. હિન્‍દી, ઉર્દૂ, અંગ્રેજી અને ગુજરાતી ભાષાના અખબારો તેમજ ટેલિવિઝન ચેનલોએ વિશેષ પરિસંવાદો અને અહેવાલો પ્રસારિત કરીને આ અભિયાનને વેગ આપ્‍યો છે. ખાસ કરીને ઉર્દૂ અને પ્રાદેશિક માધ્‍યમો દ્વારા સામાજિક અગ્રણીઓ તેમજ ધર્મગુરુઓની અપીલને વ્‍યાપકપણે રજૂ કરવામાં આવી રહી છે, જેથી સમાજના છેવાડાના વર્ગ સુધી આ સંદેશો પહોંચી શકે.

કેન્‍દ્રીય સામાજિક ન્‍યાય અને અધિકારિતા મંત્રાલય દ્વારા અમલમાં મુકાયેલા નશામુક્‍ત ભારત અભિયાન હેઠળ અત્‍યાર સુધીમાં કરોડો નાગરિકો સાથે સીધો સંપર્ક સાધવામાં આવ્‍યો છે. દેશભરની લાખો શૈક્ષણિક સંસ્‍થાઓ, શાળાઓ અને મહાવિદ્યાલયોમાં વિશેષ પરિસંવાદો, શપથ ગ્રહણ સમારોહ અને માર્ગદર્શન સત્રોનું આયોજન સતત થઈ રહ્યું છે.

આજના સંબોધનમાં વડાપ્રધાને સર્જનાત્‍મક કન્‍ટેન્‍ટ નિર્માતાઓ, યુવા સંગીતકારો અને રંગભૂમિના કલાકારોને આગળ આવવા પ્રોત્‍સાહિત કર્યા હતા. તેમણે જણાવ્‍યું કે પરંપરાગત ઔપચારિક કાર્યક્રમો કરતા સર્જનાત્‍મક અને મનોરંજક પ્રયાસો યુવા માનસ પર વધુ ઊંડી છાપ છોડે છે. આપણા યુવા સંગીતકારો નશામુક્‍ત જીવનનો સંદેશ આપતા ગીતો બનાવે અને રંગભૂમિના કલાકારો શેરી નાટકો તથા લઘુ નાટિકાઓ દ્વારા નશાના ભયંકર પરિણામો પ્રદર્શિત કરે તે સમયની માંગ છે.

ડિજિટલ માધ્‍યમો પર દેશભરના પ્રભાવશાળી યુવા સર્જકો હવે વિવિધ ભારતીય ભાષાઓમાં ટૂંકી વિડિયો, લઘુ ચિત્રો અને પ્રેરણાદાયી વાર્તાઓ પ્રસારિત કરી રહ્યા છે. જે યુવાનો ડ્રગ્‍સના ચક્રવ્‍યૂહમાંથી બહાર આવી સામાન્‍ય જીવન જીવી રહ્યા છે, તેમની સંઘર્ષગાથા રજૂ કરીને અન્‍ય પીડિતોને નવો માર્ગ ચીંધવામાં આવી રહ્યો છે.

ગુજરાત સહિત વિવિધ રાજ્‍યોના શાસનતંત્ર અને જનપ્રતિનિધિઓએ પણ આ કાર્યક્રમ બાદ રાજ્‍ય સ્‍તરે નશાબંધી અને જાગળતિ ઝુંબેશ વધુ સઘન બનાવવા સંકલ્‍પ વ્‍યક્‍ત કર્યો છે. પ્રશાસન, પોલીસ તંત્ર, શિક્ષણ વિભાગ અને સામાજિક સંસ્‍થાઓના સંયુક્‍ત પ્રયાસોથી દેશમાં નશાના ગેરકાયદેસર નેટવર્કને તોડવા સાથે માંગ ઘટાડવા પર પણ પૂરતો ભાર મૂકવામાં આવી રહ્યો છે

સર્જનાત્‍મક કલાકારો અને ડિજિટલ સર્જકોને વિશેષ અપીલ

વડાપ્રધાને દેશના લાખો યુવા કન્‍ટેન્‍ટ સર્જકોને આહ્વાન કર્યું છે કે તેઓ વિવિધ પ્રાદેશિક ભાષાઓમાં નશામુક્‍તિ વિષયક પ્રેરક સામગ્રી તૈયાર કરે. ટૂંકા નાટકો, ગીતો, કવિતાઓ અને વિડિયો દ્વારા યુવાનોને તેમની જ સહજ શૈલીમાં સમજાવવાથી આ અભિયાન વધુ અસરકારક પરિણામો આપશે.

સામાજિક ન્‍યાય મંત્રાલયનું ૧૦ કરોડથી વધુ લોકો સુધી પહોંચવાનું અભિયાન

સામાજિક ન્‍યાય અને અધિકારિતા મંત્રાલય દ્વારા દેશના સંવેદનશીલ જિલ્લાઓમાં કલેક્‍ટરના નેતળત્‍વ હેઠળ ખાસ સમિતિઓ કાર્યરત કરવામાં આવી છે. આ ઝુંબેશ હેઠળ મહિલાઓ, વિદ્યાર્થીઓ અને યુવા સંગઠનોને સાંકળીને અત્‍યાર સુધીમાં ૧૦ કરોડથી પણ વધુ નાગરિકોને સીધા જોડીને શપથ લેવડાવવામાં આવ્‍યા છે.

પ્રાદેશિક સમાચાર માધ્‍યમો અને સામાજિક અગ્રણીઓનો

સક્રિય સહયોગ

ગુજરાતી, હિન્‍દી અને ઉર્દૂ માધ્‍યમો તેમજ સ્‍થાનિક સામાજિક અગ્રણીઓ દ્વારા વિવિધ સમુદાયોમાં વ્‍યસનમુક્‍તિના સંદેશા ફેલાવવામાં આવી રહ્યા છે. સામાજિક ડર વિના પીડિતો પુનર્વસન કેન્‍દ્રો અને સલાહકારોની સહાય મેળવી શકે તે માટે ટેલિફોન હેલ્‍પલાઇન અને સહાયતા કેન્‍દ્રોની વિગતો પણ વ્‍યાપકપણે પ્રસિદ્ધ કરવામાં આવી રહી છે.