ચેન્નાઈ, તા.31: દેશમાં આગામી તહેવારોની મોસમ શરૂ થાય તે પહેલા જ દૂધના ભાવમાં મકાન-દુકાનથી લઈને સામાન્ય ગૃહિણીઓનું બજેટ ખોરવાઈ જાય તેવા સમાચાર સામે આવ્યા છે. તમિલનાડુ અને મહારાષ્ટ્ર (મુંબઈ)માં દૂધના ક્ષેત્રે મોટા ફેરફારો જાહેર કરવામાં આવ્યા છે. એક તરફ તમિલનાડુ સરકારે પશુપાલકો અને દૂધ ઉત્પાદકોના હિતમાં ખરીદભાવમાં વધારો કરીને મોટી રાહત આપી છે, તો બીજી તરફ મુંબઈમાં જથ્થાબંધ દૂધના ભાવમાં સીધો પ્રતિ લીટર ₹9નો તીવ્ર વધારો ઝીંકવામાં આવતા ગ્રાહકોના ખિસ્સા પર સીધો બોજ પડશે.

તમિલનાડુના મુખ્યમંત્રી સી. જોસેફ વિજયે વિધાનસભાના નિયમ 110 હેઠળ પશુપાલકો માટે ઐતિહાસિક જાહેરાત કરી છે. વધતા ઘાસચારા અને ઉત્પાદન ખર્ચ સામે ઝઝૂમી રહેલા દૂધ ઉત્પાદકોને ટેકો આપવા માટે માત્ર 12 દિવસમાં બીજી વખત દૂધ ખરીદીના ભાવમાં વધારો કરાયો છે, જેનાથી કુલ વધારો પ્રતિ લીટર ₹6 થયો છે. આ નિર્ણયથી રાજ્યના 3.16 લાખથી વધુ દૂધ ઉત્પાદકોને સીધો નાણાકીય ફાયદો થશે. આ ઉપરાંત રાજ્યના વિકાસ માટે કાંચીપુરમમાં સેમિકન્ડક્ટર પાર્ક અને ચેન્નાઈમાં વીજ પુરવઠો મજબૂત કરવા ₹1,762 કરોડ અને ₹1,550 કરોડના નવા પાવર કોરિડોરની પણ જાહેરાત કરવામાં આવી છે.

બીજી તરફ, મુંબઈ અને તેની આસપાસના મેટ્રોપોલિટન વિસ્તારોમાં તહેવારો પહેલા જ મોંઘવારીનો તીવ્ર આંચકો લાગ્યો છે. બોમ્બે મિલ્ક પ્રોડ્યુસર્સ એસોસિએશને જથ્થાબંધ દૂધના ભાવમાં પ્રતિ લીટર ₹9નો મોટો વધારો જાહેર કર્યો છે. 1 સપ્ટેમ્બર, 2026થી મુંબઈમાં જથ્થાબંધ દૂધનો ભાવ પ્રતિ લીટર ₹93થી વધીને ₹102 થઈ જશે, જે આગામી છ મહિના એટલે કે 28 ફેબ્રુઆરી, 2027 સુધી અમલમાં રહેશે. તાજેતરના વર્ષોમાં સિંગલ-ફેઝમાં કરવામાં આવેલો આ સૌથી મોટો ભાવવધારો છે.

મુંબઈમાં દૂધના ભાવમાં થયેલા આ વધારાની સીધી અસર સ્થાનિક બેકરીઓ, મીઠાઈની દુકાનો, ચાની લારીઓ અને હોટલો પર પડશે. પરિણામે મોર્નિંગ ચા, દહીં, પનીર, ચીઝ અને ગણેશોત્સવ જેવા તહેવારોમાં વપરાતી દૂધની મીઠાઈઓના ભાવ પણ રોકેટ ગતિએ વધવાની પૂરી શક્યતા છે. આરોગ્ય ક્ષેત્રે પણ તમિલનાડુ સરકારે રૂ. 351 કરોડના ખર્ચે મેડિકલ અને નર્સિંગ કોલેજોમાં 6,098 નવી બેઠકો ઉમેરવાની મહત્ત્વની જાહેરાત કરી છે.