નવી દિલ્હી : પશ્ચિમ એશિયામાં વધતા સૈન્ય તણાવ અને સ્ટ્રેટ ઓફ હોર્મુજ (હોર્મુઝની સામુદ્રધુની) ખાતે દરિયાઈ વેપારમાં ઊભા થયેલા વિઘ્નો વચ્ચે ભારતીય ગ્રાહકો માટે રાહતના સમાચાર આવ્યા છે. દેશની સૌથી મોટી સરકારી તેલ કંપની ઈન્ડિયન ઓઈલ કોર્પોરેશન (IOCL) એ દેશની ઊર્જા સુરક્ષાને અકબંધ રાખવા માટે કટોકટીના ધોરણે એલપીજી (LPG) ના ઉત્પાદનમાં ૩૦% સુધીનો જંગી વધારો કર્યો છે. કંપનીના આ મહત્વપૂર્ણ નિર્ણયથી દેશભરમાં રાંધણગેસ અને ઔદ્યોગિક ઇંધણની પૂરતી ઉપલબ્ધતા સુનિશ્ચિત થઈ છે.

હોર્મુઝની કટોકટી અને ભારતની ઊર્જા સુરક્ષા

ઇન્ડિયન ઓઇલની ૬૭મી વાર્ષિક સાધારણ સભા (AGM) માં ચેરમેન અરવિંદ સિંહે જણાવ્યું હતું કે, ભારત પોતાની જરૂરિયાતનું ૮૮% ક્રૂડ ઓઇલ આયાત કરે છે, જેમાંથી અંદાજે ૪૫% ક્રૂડ અને ૯૦% એલપીજીની આયાત હોર્મુઝના દરિયાઈ માર્ગે થાય છે. આ માર્ગ બંધ થવાના જોખમ સામે કંપનીએ પોતાના ક્રૂડ સપ્લાયના સ્ત્રોતોમાં તાત્કાલિક ફેરફાર કરીને અન્ય દેશોમાંથી વધારાના ક્રૂડ અને એલએનજી (LNG) ની વ્યવસ્થા કરી લીધી છે. હાલ IOC ની તમામ રિફાઇનરીઓ ૧૦૦% થી પણ વધુ ક્ષમતા પર કામ કરી રહી છે.

IOCL નું રેકોર્ડ નાણાકીય પ્રદર્શન અને ટર્નઓવર

ચેરમેને માહિતી આપી હતી કે વૈશ્વિક સંકટ છતાં નાણાકીય વર્ષ ૨૦૨૬ માં કંપનીએ ₹૮.૮૬ લાખ કરોડના વિક્રમી ટર્નઓવર પર ₹૩૬,૮૦૨ કરોડનો ચોખ્ખો નફો કમાયો છે. કંપનીની રિફાઇનરીઓએ રેકોર્ડ ૭૫.૪૫ મિલિયન ટન ક્રૂડ પ્રોસેસ કર્યું હતું. ચાલુ નાણાકીય વર્ષના પ્રથમ ત્રિમાસિક ગાળામાં પણ IOCL ની રિફાઇનરીઓ ૧૦૯.૪% ની ક્ષમતા પર ચાલી રહી છે, જેનાથી પેટ્રોલિયમ પ્રોડક્ટ્સ માર્કેટમાં કંપનીનો હિસ્સો વધીને ૪૩.૧% થયો છે.

ભવિષ્યની યોજનાઓ અને ગ્રીન એનર્જીમાં રોકાણ

ઇન્ડિયન ઓઇલ પોતાની પ્રોસેસિંગ ક્ષમતા ૮૦.૭૫ મિલિયન ટનથી વધારીને ૯૮ મિલિયન ટન કરવા માટે પાણિપત, ગુજરાત અને બરોની રિફાઇનરીઓનો વિસ્તાર કરી રહી છે. કંપની ૨૦૩૦ સુધીમાં પેટ્રોકેમિકલ્સ અને ગ્રીન હાઇડ્રોજન ક્ષેત્રે મોટું રોકાણ કરવા જઈ રહી છે. પાણિપતમાં દેશનો મોટો ગ્રીન હાઇડ્રોજન પ્લાન્ટ સ્થાપાઈ રહ્યો છે, જ્યારે રિન્યુએબલ એનર્જી યુનિટ 'ટેરા ક્લીન' હેઠળ ૪.૩ GW ક્ષમતાના ગ્રીન એનર્જી પ્રોજેક્ટ્સ પર ઝડપથી કામ ચાલી રહ્યું છે.