રાસુવા,તા.૦૧: નેપાળના રાસુવા જિલ્‍લામાં પૂરગ્રસ્‍ત ૧૧૧ મેગાવોટના રસુવાગાધી હાઇડ્રોપાવર પ્રોજેક્‍ટમાં ગુમ થયેલા કામદારોની શોધ દરમિયાન કોઈ બચી શક્‍યું નથી. થર્મલ ડ્રોનનો ઉપયોગ કરીને, બચાવ ટીમ ભૂગર્ભ ટનલના છેડા સુધી પહોંચી પરંતુ જીવનના કોઈ સંકેત મળ્‍યા નથી. પ્રોજેક્‍ટ સ્‍થળ પર ઓછામાં ઓછા ૯૩ કામદારો ફસાયેલા અથવા ગુમ થયા હોવાની આશંકા છે. બચાવ કામગીરીમાં નેપાળી સેનાના કર્મચારીઓ, ઍન્‍જિનિયર્સ અને એક વિશિષ્ટ ડ્રોન ટીમનો સમાવેશ થતો હતો. ભોટે કોશી નદીમાં પૂર આવ્‍યા બાદ, એવી આશંકા હતી કે ઘણા કામદારો ટનલની અંદર ફસાયેલા હતા, ખાસ કરીને ટનલના સૌથી અંદરના ભાગ અંગે ચિતા વ્‍યક્‍ત કરવામાં આવી હતી. વડા પ્રધાન સચિવાલય અનુસાર, સેનાની આગેવાની હેઠળની એક ટીમ રસુવાગાધી પ્રોજેક્‍ટ ટનલના અંતિમ ભાગમાં પહોંચી હતી. ત્‍યારબાદ ટનલની અંદરના વિસ્‍તારોનું નિરીક્ષણ કરવા માટે થર્મલ ડ્રોનનો ઉપયોગ કરવામાં આવ્‍યો હતો કારણ કે બચાવ ટીમ માટે સીધો પ્રવેશ કરવો મુશ્‍કેલ અથવા અસુરક્ષિત હતો. નિરીક્ષણમાં બચી ગયેલા લોકોના કોઈ સંકેત મળ્‍યા નહીં. ડ્રોન સર્વે પૂર્ણ થયા પછી, કામગીરી બંધ કરવામાં આવી હતી, અને બચાવ ટીમ રસુવા જિલ્‍લાના ધુંચે પરત ફરી હતી.

નેપાળમાં આવેલા પૂરે હાઇડ્રોપાવર ક્ષેત્રને ગંભીર અસર કરી છે. પૂર સમયે, સેંકડો કર્મચારીઓ વિવિધ પ્રોજેક્‍ટ્‍સમાં ભૂગર્ભ ટનલમાં કામ કરી રહ્યા હતા. બચાવ ટીમો હવે એ નક્કી કરવાનો પ્રયાસ કરી રહી છે કે ગુમ થયેલા કામદારો ટનલમાં ફસાયા છે, સુરક્ષિત રીતે પહોંચવામાં સફળ થયા છે, કે પૂરના પાણીમાં વહી ગયા છે.