મુંબઈ, તા.૦૧: દક્ષિણ અને મધ્ય મુંબઈની વર્ષો જૂની અને ગંભીર ટ્રાફિક સમસ્યાને હળવી કરવા માટે એક મોટો અને મહત્વપૂર્ણ માર્ગ મોકળો થયો છે. મધ્ય અને પશ્ચિમ રેલવેને જોડતા ૧૧૨ વર્ષ જૂના બ્રિટિશકાલીન ઐતિહાસિક પ્રભાદેવી (એલ્ફિન્સ્ટન) રેલવે બ્રિજની જગ્યાએ બની રહેલા આધુનિક ડબલ-ડેકર ફ્લાયઓવરનું નિર્માણ કાર્ય નવેમ્બર, ૨૦૨૬ સુધીમાં પૂર્ણ કરવાનો લક્ષ્યાંક મહારાષ્ટ્ર રેલવે ઇન્ફ્રાસ્ટ્રક્ચર ડેવલપમેન્ટ કોર્પોરેશન લિમિટેડ (મહારેલ/MRIDC) દ્વારા નિર્ધારિત કરવામાં આવ્યો છે.

જમીનનો કબજો મળ્યાના માત્ર એક જ વર્ષની અંદર આ બ્રિજ તૈયાર કરીને વાહનવ્યવહાર માટે ખુલ્લો મૂકવાનું રેકોર્ડ આયોજન છે.

રેલવે બ્લોક્સની તૈયારીઓ અને સ્ટીલ સ્પેન મુંબઈ પહોંચ્યા
આ મહત્વાકાંક્ષી પ્રોજેક્ટ માટે જરૂરી ચારેય વિશાળ સ્ટીલ સ્પેન ૧૫મી ઓગસ્ટ, ૨૦૨૬ના રોજ મુંબઈ લાવી દેવાયા છે. તેમાં ૯૨.૫ મીટરના બે અને ૩૪.૫ મીટરના બે સ્પેનનો સમાવેશ થાય છે.

•    નાઈટ બ્લોકની માંગણી: ગર્ડર અને સ્પેન બેસાડવા માટે સેન્ટ્રલ અને વેસ્ટર્ન રેલવે પાસે ૨૫ દિવસના સમયગાળામાં અઢી-અઢી કલાકના કુલ ૩૯ નાઈટ બ્લોક્સની માંગણી કરવામાં આવી છે.

•    મંજૂરી પ્રક્રિયા તીવ્ર: તેમાંથી ૩૨ બ્લોક્સ બે મુખ્ય સ્ટીલ સ્પેન ઈન્સ્ટોલ કરવા માટે વપરાશે. રેલવે હેડક્વાર્ટરના એન્જિનિયરો પાસેથી આખરી મંજૂરી મેળવવાની કામગીરી પૂરજોશમાં ચાલી રહી છે.

પ્રભાદેવી ડબલ-ડેકર ફ્લાયઓવરની મુખ્ય વિશેષતાઓ:
•    લંબાઈ અને ખર્ચ: આ પ્રોજેક્ટની કુલ લંબાઈ ૧૩૨ મીટર છે અને તેનો કુલ અંદાજિત ખર્ચ ₹૧૬૭.૩૫ કરોડ છે.

•    ડબલ-ડેકર સ્ટ્રક્ચર: આ ફ્લાયઓવર સેન્ટ્રલ અને વેસ્ટર્ન બંને રેલવે લાઈનોની ઉપરથી એકસાથે પસાર થશે.

•    લોઅર ડેક (નીચલો ભાગ): સ્થાનિક વાહનવ્યવહાર માટે ૨+૨ લેનનો રસ્તો અને બંને બાજુ ફૂટપાથ હશે, જે પ્રભાદેવી પૂર્વ અને પશ્ચિમને સીધું જોડશે.

•    અપર ડેક (ઉપરનો ભાગ): અપર ડેક ૨+૨ લેનનો ફ્લાયઓવર હશે, જે સીધો શિવડી-વરલી કનેક્ટર (Sewri-Worli Elevated Corridor) સાથે કનેક્ટ થશે. આનાથી પ્રભાદેવીથી સીધા 'અટલ બિહારી વાજપેયી શિવડી-ન્હાવા શેવા અટલ સેતુ' (MTHL) પર મુસાફરી કરવી અત્યંત ઝડપી અને સરળ બની જશે.